大市成交持續淡靜，恒指昨日先高後低，有迹象大戶力壓期指以達成低位轉倉目標。今日終於捱到十一月結算，人民幣躋身SDR消息確認在即，後市係龍係蛇好快有答案。
偶發性挾淡情況，過去一個月已經歷三次，估唔到期指都一樣有傻盤。昨日開22,613點後，一分鐘搶到23,055點，十二月期指更見23,100點，近五百點波幅。
惟不計價入盤一瞬即逝，好快回到22,730至22,860點上落區。搵番記錄睇，23,000點樓上即月及下月共1,959套交易，嫌錢腥的傻盤唔少。午後曾跌穿開市價，三點後趨向淡靜，日市收報22,525點，十二月期指收報22,527點，成交有6.1萬張。
大市未有脫離牛皮窄幅悶局，恒指收22,488點，10日、20日及50日線差距收窄到216點，指示作用不大，恒指波幅指數跌0.21至21.09，低成交悶局未改，開大開細均可。今日結算加埋最遲周一清楚人幣SDR結果，若今日未見突破，索性睇埋周一會否出現單邊升或跌市先入市追勢。
John Mullen