Market Insight：農業股有國策護蔭

儘管美國下月加息似乎成定局，近排香港地產商似要趕喺加息前出貨，新盤供應源源不絕，在貼近二手定價下，暫見銷情唔錯，加埋昨日大和唱好話地產股明年有兩成升幅，昨日早市幾隻重磅地產股走勢唔錯，可惜最後個市倒插，升幅水瓜打狗，埋單信和置業（00083）升0.6%、新地（00016）升0.4%、長實地產（01113）升0.19%。

香港地產股自○七年開始，基本處於樓價升唔關佢事的背馳狀態，古勝亦講過N次，即使睇樓價要跌，都唔應該將跑輸樓市八年的地產股看得太淡，除非樓價出現九七年般，短短時間狂插三成的跌市，引發恐慌拋售另作別論。否則打住六、七折價錢牌的地產股，其實現水平幾抵買。

債商預計緩慢加息

再者，美息未來有幾多上升空間，在下仲係相信十分有限。隔晚美國耐用品訂單數據回升，君可見290億美元的七年期國債拍賣一樣銷情火熱，十年期美債孳息月初在2.37厘見頂，在加息進入倒數，反而級級落去到隔晚2.23厘水平，可見債商對緩慢加息，且幅度有限是頗有信心。

況且退後一步去睇，依家歐、日、中全部開大水喉，美國加息後唔單止令息差擴闊，美金勢必火上加油，形同兩部冷風機一齊吹住個美國經濟，高盛估美國明年加息4次，每次0.25厘，古勝心目中明年加到兩次經濟唔散番落嚟，經已算超額完成。

向來無乜炒味的龍光地產（03380）批股，以2.78元配售5.58億股，集資最多15.5億元，據知RRJ及惠理（00806）兩個基金接咗三分二貨源，昨股價最低插到2.66元，最後收2.76元，跌14%，估唔到咁少貨流出都要穿批股價。

相信近期到過旺角、銅鑼灣都會見到周街吉舖，唔少主攻內地客零售商，情願結業都唔捱埋聖誕、新年旺季，內地反貪對奢侈品消費衝擊之大，營商者睇得多淡經已表露無遺。

大快活已唔算抵買

本港零售業大吹淡風，珠寶首飾、鐘錶化妝品都唔掂，唯獨飯點都要開。快餐股大快活（00052）份中期成績表唔錯，多賺35.3%至1.02億元，撇開賣物業收益，核心溢利9,020萬元亦升19.8%，期內每股盈利80.63仙，中期息31仙再送特別股息9仙。

商舖租金見頂回落的幫助未有咁快見到，成績表理想主因內地物價回落，加埋港元回勇下令食材成本減省，毛利率有1.4個百分點改善去到16.4%，出現盈利遠高於營業額增長的情況。

大快活無疑是悶聲發大財一類股票，多年來管理及效率的逐漸提升，昨日業績後股價高見25.85元歷史新高，收市升3.6%收25.4元，同海嘯低位0.47元比較，累積升55倍。

以往幾倍PE冇人吼，今日搞搞吓去到一六年17、18倍，開始有少少貴。見到佢份業績，對更貴的大家樂（00341）自然冇乜興趣，反而，估值原本由三隻餐飲股中最高，落到依家唔夠16倍的翠華控股（01314），依家可以睇番好些少。

第十八屆五中全會發布「十三五」規劃，加快農業現代化步伐為重要任務，總理李克強最近亦多次表示，農業現代化為破解「三農」問題的重要途徑，而國務院月初亦發布了「深化農村改革頂層設計方案」，明確深化農村改革總體要求與任務目標，以及改革關鍵領域作出整體設計，在國家大力推動之下，相信有利農業相關行業的發展。

國農前景備受看好

過住提到農業股，市場首先會聯想到第一拖拉機（00038），但隨着國農控股（01236）積極拓展業務，相信更能受惠於農業現代化的發展。

國農業務定位清晰，除發展農村金融外，業務更延伸至農產品批發貿易、農機裝備等。在國家政策推動下，國農有望成為高增長股，內地券商安信亦看好公司，給予買入評級，目標5.8元。

古勝