絲絲講場：渣打分行「周街走」
以後如果見到架貼住渣打香港銀行標誌嘅Van仔，佢就係全港獨有嘅銀行車，無咩銀行嘢要處理嘅，都可以見識吓新嘢。咪話唔提你，唔好11至12點去，因為櫃台姐姐係行「孖必」嘅。
非食飯鐘數，都唔見有人？櫃台姐姐可能一齊行開去咗洗手啫。嗱，千祈唔好發爛渣踢車，架車裝晒鋼板同防彈玻璃，仲有兩個保安喺度睇實。
渣打香港行政總裁陳秀梅尋日率先試新嘢，佢下星期要上北京有個銀行公會Trip，所以換咗800蚊人仔。仲有渣打大中華及北亞地區行政總裁洪丕正就話入咗張票2,888蚊，係佢Lucky Number。點解？撳吓機，睇吓2888係邊隻股份冧把。
余絲韻