講完火雞，再送多樣嘢應節，知唔知點解今日叫「Black Friday」？
嗱嗱嗱，唔係十三號嗰個，美國感恩節（十一月第四個星期四）之後嗰日（即係今日）都係叫「Black Friday」，呢日代表聖誕購物期正式開始，美國商戶會大減價，大家趁機執平嘢做聖誕禮物。
呢日對商家嚟講好重要，有啲幾乎全年（一月至十一月）都蝕緊嘅零售商，就係靠由呢日開始扭虧為盈，有啲甚至靠呢季賺到，嚟冚番之前三季所蝕嘅錢。
好哋哋點解係黑色？古仔係咁講，傳統會計帳簿上，「賺」用黑墨水記，「蝕」用紅墨水記。叫呢日做「Black Friday」，就係寓意由呢日開始，帳簿紅變黑，盤數靚仔番晒。
仲有個講法，話關啲售貨員事，因為呢日佢哋實做到無停手，係佢哋嘅「黑仔日」咁話。
關你乜事？關！香港好多廠家出口貨物去美國，呢日都係港商嘅食胡日，都關香港經濟事o架。
余絲韻