絲絲講場：股市黑天鵝實情係火雞？

出書遇金融風暴成名

「黑天鵝」（唔係講Natalie Portman呀，雖然絲絲都好想出佢張相）係指超出期望同過去經驗，而又真係發生咗嘅嘢。財經世界個個講「黑天鵝」，話乜乜乜可能就係下隻股市「黑天鵝」；不過既然都已經有預期，仲點會係「黑天鵝」呢？

咁多一知半解，不如聽番黑天鵝學派教主塔利布（Nassim Taleb）點講。塔利布係個大學教授，佢○七年出咗本書《黑天鵝效應》（The Black Swan），○八年就嚟一場金融風暴，估唔到塔利布就咁一炮而紅，畀人封埋做教主。

往績預測經濟信唔過

塔利布喺本書度，就以感恩節火雞嘅一生嚟解釋「黑天鵝」。佢話一隻火雞，一出世就朝朝有農夫餵，火雞於是覺得農夫係全世界對佢至好嗰個，每見到農夫就預咗有得食。去到第一千零一日，係感恩節前兩日，農夫帶嚟嘅係把屠刀、唔係嘢食……火雞嘅幸福指數由最高點跌到零。

即係，有啲過去一路都知嘅嘢同方法，係會有一日突然完全「唔啦更」、唔對題，甚至原來去咗相反方向。所以，塔利布佢唔多信往績可以預測未來嘅經濟前景囉。

余絲韻