絲絲講場：碌卡13億買畫有幾多積分？
碌卡買樓你聽過，但碌卡碌13億碌個「祼女」返嚟又點？
劉益謙曾碌2.8億買隻盃
話說內地富豪劉益謙上星期喺佳士得拍賣會，用13億港元天價買咗幅名畫《斜卧的祼女》。劉富豪佢一向鍾意碌AE黑卡買嘢，記得佢舊年喺蘇富比投咗隻明成化鬪彩雞缸盃，交收時抹都唔抹，就即刻用隻盃嚟飲陳年普洱，仲話無非係為咗吸口皇帝、妃子嘅仙氣！劉富豪當時就係碌黑卡畀嗰2億8蚊，要分24次嚟碌，總共賺咗4億幾分！
賺積分夠搭千程頭等機
若果劉富豪今次個「祼女」又係用黑卡碌返嚟嘅話，有分析員估計，佢賺到嘅分，大概可以換一千程來回北京紐約嘅頭等機票。不過，聽講劉富豪佢今次冇碌卡，話「付款會按佳士得的說明進行」。唔通佳士得唔收卡？
你都想碌卡碌到億億聲？首先要有呢張黑卡。這些機會不是屬於我的？嗱振作啲，劉富豪80年代時都只係揸緊的士啫。
余絲韻