高盛每兩年升一次MD，前日就一口氣升咗425人做董事總經理（MD，Managing Director），MD係僅次於Partner（合夥人）嘅職級，今次比上次升多咗51%人！話時話，高盛上個星期先公布咗3條新橋想留住啲Juniors，依家又一口氣升咁多Seniors，唔通投行真係畀科企同Buyside（對沖基金同私募基金嗰啲）搶晒啲人？
投行要留啲Seniors唔難，唔係「名」就係「利」，反而要留啲Juniors先頭痕。好多年輕尖子入咗投行兩年後即閃！點解？因為嫌升職加薪慢兼冇Work-life Balance，純為份靚CV脆脆哋捱兩年咁。高盛上星期就出咗3條新橋留Juniors。
新仔走人，除咗因為無限工時，仲嫌啲嘢「連馬騮都識做」，唔想日日對住Excel入Data同整Pitch Book。高盛留人第一招就係，再科技化啲，等班新仔對少啲Excel。即係點？絲絲都想知。
第二招就係放佢哋去外國Wet。只要捱過頭兩年Analyst生活，就有機會派去海外分行「玩」！唔好意思，應該係工作一年。
第三招比較實際，就係加快晉升。以前規矩係，做分析員至少兩年，然後睇吓有冇得升做Associate……升到上VP（Vice-President），閒閒哋都六年半，仲未計要返商學院進修吓咁。高盛依家呢到減一年、嗰度扣一年，總之你夠尖子嘅話，最快五年半做到VP。話時話，唔通今次升咁多新MD，就係為咗空啲位出嚟畀班Juniors上？
余絲韻