絲絲講場：Bitcoin搞手獲提名諾獎？

提名嗰位，係加州大學洛杉磯分校金融學教授Bhagwan Chowdhry，佢喺赫芬頓郵報（Huffinton Post）嘅網誌上撰文話，已經提名咗中本聰為一六年諾貝爾獎經濟學獎候選人。

中本聰是否真有其人？就咁嘅，舊年有位64歲叫中本聰嘅日裔工程師，畀傳媒話就係Bitcoin發明人真身，但嗰位仁兄一味否認，之後仲人間蒸發埋。

之不過，若然諾貝爾獎當局呢次真係接納今次提名，明年又真係得咗諾貝爾經濟學獎嘅話，嗰位疑似真身又會唔會去蒲頭領獎呢可。就算真身唔蒲頭，阿提名人Chowdhry都話好樂意代真身去領獎喎。

又聽講，截至舊年，外界估計發明人中本聰真身可能仲揸住成百萬枚Bitcoin，按照尋日個價計，大概值3.7億美元，即是28億幾港元。即係點？即係阿真身大把錢，獎金對佢嚟講濕濕碎，會否蒲頭攞獎，只係睇佢貪唔貪個「名」。明年十月就公布結果，十二月就頒獎禮，絲絲擔定櫈仔。

余絲韻