北水頭等倉：中海可作內房穩膽

一如所料，上大人出手救內房，與房地產相關的行業都能受惠，如建材、家電等等。上周五家電股便一洗頹風，國美電器(00493)股價急彈12%，成交達3.07億元；海爾電器(01169)亦升9.9%，收報14.2元，成交2.52億元；創維(00751)及TCL多媒體(01070)均升一成，真係好耐冇見呢個板塊有咁熱鬧，若然氣氛繼續轉旺，建議睇實隻創維。

中航科工有料到

此外，軟件及科網股亦見異動，中訊軟件(00299)股價急升18%，金山軟件(03888)升3%、網龍(00777)升5%、擎天軟件(01297)升7.75%。不過，交投一般，略嫌鑊氣唔夠，可以睇多一兩日再下定斷。上周五提及的中航科工(02357)果然有料到，注資消息刺激股價急升12%。既然股價成功突破阻力位，守穩6.2元可繼續坐順風車。

講番內房股，筆者認為都係唔大唔揀最穩陣。畢竟如今內地經濟仍存不明朗因素，一旦外圍又有咩冬瓜豆腐，高債民企內房最危，實際上是國家控股的大型房企，即使衰到無譜肯同佢捱唔會得番零，若然行業景氣真係改善，大型房企物業組合全國覆蓋率高，能受惠利好政策的程度自然較大。

如果想追內房股，建議留意中海，上周五收報25元，走勢上股價以大成交重上250日線，10日線亦剛重上50日線，短線現利好訊號，追入目標上試27至28元區域，失守23.5元止蝕。

內地消息

‧人行行長助理撰文指，未來會加強預調微調但不會搞強刺激。

‧國家能源局官員預計，《加快電動汽車充電基礎設施建設的指導意見》即將發布實施。

‧國土部指，《不動產登記暫行條例實施細則》將於近期發布。

司慕渢