絲絲講場：港股隨時有個「扯旗山」
依家市況雖麻麻，但「殼股天堂」創業板依然好熱鬧，九月份有成十間公司遞上市申請，其中有間公司，絲絲一睇都「嘩」咗，間公司叫「扯旗山有限公司」，主要資產淨得上海兩間「查餐廳」（絲絲冇寫錯字，睇埋落去）。
周中師傅做非執董
呢間扯旗山今年上半年仲蝕錢，都想喺香港搞上市，仲搵埋周中師傅做非執行董事（冇錯，係好多香港人都識嗰位周中師傅）……成件事唔係拍戲，不過扯旗山創辦人兼主席侯傑輝以前真係做電影製片。
侯主席係香港人，九十年代做港產電影製片出身，○九年到上海創業，一共開咗兩間叫「查餐廳」嘅港式茶餐廳，最近喺當地再新開麵館。不過，扯旗山業績似乎就……一三年純利七百幾萬，一四年唔夠六百萬，今年上半年更加蝕七十七萬幾。
絲絲啲Banker Friend講，創業板係無盈利要求，只要過去兩年現金流各有二千萬，同上市市值超過1億，有噱頭圍到飛就得。
余絲韻