絲絲講場：富豪有要求 幾難都搞掂
早排嘅「港男40萬求婚」，有好多人露出對心心眼，亦有好多人眼睥睥。有禮賓服務公司話，的確多咗客搵佢哋幫手諗計度橋，不過負責人就話，求婚就多，搞Anniversary Party（周年紀念）就少。呵，結咗婚就算？
禮賓服務公司係乜？簡單啲講就係「包搞掂」公司，基本上只要個客諗得出，佢哋就包搞掂。有錢人有啲乜自己搞唔掂，要搵人幫手呢？
午夜前搵千支玫瑰
Aspire Lifestyle增值業務部主管黃銳龍（Johnny）話，曾經有個客喺上海識到個心儀女仔，個客想喺午夜12點前送1,000支玫瑰畀人家。佢哋收Order時係夜晚9點，只得三個鐘，要發散同事去搵未閂舖嘅花店刮玫瑰，再集合埋包裝。最後？Mission Accomplished（任務完成），講緊係玫瑰嗰Part；追唔追到？唔知呢。
咁又有冇Mission Impossible？原來都有。
唔可行會向客解釋
香港區總經理鄭韓菊芳（Cindy）話，唔可行嘅要求，佢哋會向個客解釋。好似，想婚禮時放白鴿？佢哋就建議客人唔好咁做，事關效果同想像會有出入，白鴿其實好難控制。明嘅，當婚紗遇上白鴿Poo，想像得到有幾震撼，有啲浪漫都係留番畀吳宇森算。
買演唱會飛同Book枱食飯絕對係小兒科，試過有外國客嘅太太想要某日睇電視見到一個MV入面女主角嗰對耳環！佢哋就要搵番當日節目表、再搵MV、搵埋歌星經理人、問隻耳環乜牌子邊度買。
又試過馬年嗰陣，有美國客要喺一個星期內，搵兩隻馬仔放喺屋企花園行吓行吓，嚟招呼Party朋友。絲絲諗，好彩唔係龍年。
余絲韻