A股跌港股跟跌，歐、美股市跌港股又要跟跌，呢期炒港股真係好冇癮。中秋假後首個交易日恒指唔見629點，成交840億元話少又唔算太少。由於接下來又係十一假期，長假後又唔知咩光景，都係咪亂撈貨！
愈來愈多評論話預計深港通年內唔會開通，但港交所（00388）股價似乎已反映相關因素，昨日收報177.7元，僅跌2%。由於預期十月份恒指有機會下試19,000至20,000點水平支持，淡市因素尚在發酵，想繼續捧小加場的話，唔爭在等再試52周低位162元支持先再睇位行事。
傳聞外管局限制銀聯每年境外只可提取10萬元人民幣，若然屬實，不利內地旅客大額消費，港澳旅遊、消費、娛樂等行業肯定係受害者。政策者要修補漏洞防範金融風險無可厚非，不過在經濟不景時做呢個動作，尤如傷口灑鹽。
如今選股要有兩大因素，其一是主營內地市場，不受外圍因素影響；其二是有產業政策支持，不受經濟周期因素影響。基於兩大原則，留意了國藥（01099）。
國藥主要經營醫藥分銷，去年度該業務佔總營業額比例近95%，其餘來自醫藥零售及其他業務。內地醫藥市場政策環境及競爭格局變化，有利推動整合併購加速進行，行業集中度持續上升，類似國藥的大型業者成受益者。此外，針對國企改革，公司正積極探索混合所有制改革，不妨留意相關的進度。
走勢上，該股昨日收報27.1元，短線料繼續在25至27元水平整固，向上須以大成交突破29至30元阻力始能扭轉悶局，可候低部署。
司慕渢