Market Insight：資源股暫避風頭

八月份工業利潤大跌關唔關股市事？看似無關，但眾所周知不少企業將資金投放股市多過做生意，股災之後更被迫增持或回購，事件後遺症可能延續至九月及十月。不過，內地雖輸出衰退，但A股近日卻跑贏全球股市，3大指數昨分別跌1至2%，古勝上周初預言滬綜指3,200點會走貨，同樣道理，到3,000點就算冇國家隊托市，亦會有散戶投機性撈底。

今日係「十一」前最後一個交易日，然後放七日長假，滬綜指估計點都會頂住3,000點收市免得有損「國慶」，但海外投資者可能睇見成個禮拜冇交易風險太大，所以趁呢兩日沽咗先，昨日滬股通亦賣盤超買盤。

兩大會議成焦點

現時內地每有重要經濟數據公布，市場已成驚弓之鳥，放完長假後又可能面對連串經濟數據及股市酷刑，原來GDP增長7%定義是底線不低過6.5%，似乎先為自己封定後門，第四季有五中全會和中央經濟工作會議兩個大會，過往大會前夕例牌股市做好，現亦傳出將出動「組合拳」救市，放假期間可能先來降準，但若無新招恐怕效果爾爾。

假如今日大吉利是，滬綜指跌穿3,000點，恒指跌穿兩萬點，是否會來一次技術反彈？正如前文所言，近期陷阱處處，上次恒指跌穿兩萬點已要追溯至一三年七月，半年後個市反彈3,000點；今次恒指累跌8,000點，但22,000點屢試不穿，假設穿20,000點博重上21,000點並不是奢望，正如滬綜指在3,000至3,200點之間玩上落亦搵到幾餐晏仔，但是否博得過見仁見智。

手持現金最安全係人都識，尤其現在危機四伏，昨重災區是資源礦業股，嘉能可單嘢有機會演變成商品災難，原因公司要賣資產還債，手上咁多商品庫存推出市場咪話唔驚。立基工程（08369）上市兩日就上天下地。大股東密密增持的輝山乳業（06863）竟鬧出有毒原料風波，就算澄清後亦可能對銷量有影響。

靠消費難谷經濟

唯一一隻強勢股都出現意外，炒股不炒市只是空談，投資者寧博窩輪及牛熊證，昨衍生工具佔大市成交接近四成，資金明顯流入牛證，但沽空金額亦增至14%。

內地以前靠低工資已可獨步江湖，從而亦帶動投資和消費，增長具有其必然性，但現時回落也是必然，不計所謂「中產收入陷阱」，出口和投資已走到盡頭，希望靠內需去推動經濟是最大方向，所以有股市財富效應谷經濟的妄想。然而，消費並不單看今日在股市賺了多少錢，主要是看對經濟前景的信心，若見經濟蕭條，有錢亦寧願儲起傍身。內地的儲蓄率無疑全球最高，但「磚頭最保值」已根深柢固。

究竟內地仲有乜符弗「保七」實在成為疑問，但不能放軟手腳，發改委八、九月「密密批」，昨又有逾千億鐵路項目，今時今日仲要靠基建投資可見冇料到。事實上，現時大部分公路有排都未飽和，就算鐵路投資到明年已可能見頂回落。個人意見認為，尚僅餘核電投資仍有空間，原因是自福島事件後已有很大段真空期，而海外國家對核電的興趣亦僅次於高鐵。

中廣核電具賣點

有消息話，內陸核電在選址及安全性方面已進行調研，有機會重新啟動。而海外項目亦有好消息，本月內中廣核集團同肯尼亞簽約開發核電，中國核工業集團與美國泰拉能源簽署第四代核電開發協議，而英國早前亦宣布內地將建設當地預算超過2,400億元人民幣的核電廠，習主席下月將訪問英國，相信將會帶來中英在高鐵或核電進一步合作的好消息。

當然，以上的好消息早前已為核電股帶來小陽春，中廣核電力（01816）曾連升四日，但不能否認核電是內地少數基本因素轉好的板塊，中廣核電上半年盈利亦增長36%；受惠於沿海核電重啟，惟核電的建設期及入帳期較長，未來才會逐步反映，集團並期待將獲母公司注入核電廠，缺點是估值偏高，但短線卻不乏催化劑。

古勝