絲絲講場：月光族買樓大想頭

絲絲好尊重「夢想」兩個字，以前唔敢隨便講，到依家講唔出，絕對佩服啲人咁清楚自己想要乜。尋日出咗個針對香港80、90後嘅調查話，依家香港年輕人頭號夢想係「買樓」。不過，調查又話，每六個年輕人就有一個係「月光族」，一蚊都儲唔到，甚至入不敷支。咁即係點？

個調查兩年前亦做過一次，嗰陣時月月使清嘅年輕「月光族」，每七個先有一個咋，惡化咗！

消費模式方面，七成幾人都好有打算冇超支，但「通常會使凸」同「先使未來錢」嘅加埋都有成22%，22%唔算少，你身邊嗰啲都好易中。

講到夢想，80、90後嘅五大夢想，都係兩年前嗰五大，只係排名有少少變。頭位依然係「買樓」，不過比兩年前少咗5個百分點，得番29%。不過，又唔怪得年輕人，就算努力儲錢上車，但樓價高到望唔到，連儲嘅動力都冇埋嘅。

至於點先可以變有錢？最大部分年輕人認為係「投資」（41%）、其次係「儲蓄」（17%）同「努力工作/創業」（16%）。首選投資，絕對正確，今時嘅年輕人果然知得多好多。不過，有六成受訪者話冇投資！

余絲韻