香港租金貴成點？瑞銀新鮮出爐《價格與收入》報告，研究全球71個城市，香港物價全球排第十九，但一計埋租金就即跳十三級，飆上第六位。香港嘅租金係全球第二貴，僅次於紐約。
講到人工，香港係日本以外工資最高嘅亞洲城市。不過，份糧賺返嚟唔係全部有得使，事關要交稅同強積金供款。就好似丹麥哥本哈根咁，扣咗稅同社保供款後，差唔多冇咗半份糧；而香港只係少咗11%，算係咁。
人工只係數字啫，買到幾多嘢先實際，所以要睇埋工資嘅實際價值。中學都有教，「價值」有分「Nominal（名義）」同「Real（實際）」，即係就算工資高，若然當地物價都高，購買力會打折扣囉。中學冇教？絲絲以前讀嗰間有喎。
購買力點比較？就咁嘅，香港人平均工作9分鐘就買到個巨無霸漢堡包，係調查城市入面時間最少嘅；最多係肯尼亞內羅畢，要做約3個鐘！
解決完食，報告仲計埋iPhone 6 16GB，瑞士蘇黎世平均做20.6個鐘就可買到，但烏克蘭基輔嘅人就要唔瞓覺做足26日，香港就要51.9個鐘。點解揀呢兩樣消費品？瑞銀話，全球好多地方都買到，加上品質差唔多喎。
仲有，原來香港打工仔係全球最搏命嘅，每年工作2,606個鐘，工時全球最高，比最唔使做嘅巴黎多咗成1,000個鐘。同大家一樣，絲絲都係焗住搏命，說好的最高工時呢？
余絲韻