市場普遍睇淡閱兵後行情，雖然人行行長向外派定心丸，話股市調整大致完成，中證監又話研究制訂指數熔斷機制，但A股只係威過一陣，昨日午後又再復跌，埋單滬綜指跌逾2%，內銀股成主力套現對象，真的一次又一次大盆冷水照頭淋。睇嚟周五違法配資戶要全部銷戶的限期前，A股仲會有沽壓。
港股唔使擺咁多姿態，話跌就跌，恒指下試20,500點水平支持，短線國指及恒指或會分別下試9,000點及20,000點支持。
雖然昨日收市前已盛傳國企改革指導文件即將下發，但相關概念股冇大反應，主板成交縮減至671億元，陰乾日子確實難捱。
在成交萎縮下，板塊表現難成氣候，股份表現僅呈個別發展。醫藥股中，昨見康哲藥業（00867）股價連續第二日反彈，最終重上9元樓上，收報9.03元，升5.99%，成交達1億元。
過去兩年康哲的業績表現理想，股價累積可觀升幅，至去年末季股價升抵15元水平遇阻，今年四月再次上衝15元水平後回落，之後就進入大調整，以近日低位7.78元計，累計跌幅已接近五成。
理論上，近兩日的升勢是極度超賣下的反彈行情，雖然市盈率已由高位回落，但如今中資股估值普遍大跌，更好的成長股，估值都要打折。
以康哲現價往績市盈率16倍計，今年預測市盈率14倍，相信8至9元水平乃主要支持區，只是反彈動力亦未必會太大，10元關阻力非輕，策略只宜在8至10元水平高沽低揸。
司慕渢