人社部上周五話，兩萬億人民幣養老金可用於投資，市場估計其中有六千至七千億可投入股市。呢番話，好明顯係話畀大家知中央救市銀彈十足，等大家定啲！
上周四、五，國家隊都係臨尾市先至入場托高指數。老實講，如果真係好想買貨，應該唔會咁樣度縮數等尾市先至動手。故筆者相信，這只是閱兵前的維穩措施。過咗九月三日，A股又好可能回復疲態。
滬股通連續四日錄得逾280億元人民幣資金流入後，上周五斷纜，錄得淨流出逾24億元人民幣。到底所謂的「聰明錢」，係咪真係趁低吸納作長線持有，抑或另有目的？反正呢幾百億，相對於刻下環球股市動盪，杯水車薪，暫時唔好因為呢個數字而減低對A股風險的警惕。
板塊方面，四大行公布中績，整體而言，其實盈利數字不是關注點，皆因早在預期內。反而資產質素下降及息差壓力才是關注點。下半年股市波動，中央救市代價，一定程度轉嫁到銀行身上，當指數尋底，次季上市公司股權質押風險將表露無遺。
內銀小股東要分擔國家維穩任務的代價，風險前所未有。若仲未上車，且別以往績市盈率作內銀股估值便宜的結論，甚而作出「低吸」決定。謹記若年底前中國風險再上升，引發至環球股市暴跌層面，內銀股頗大機會集體下試一一年低位。
司慕渢