絲絲講場：證監打虎都有空窗期？

施衛民過檔英國FCA

事關呢個位真係唔易搵人，打虎得罪人多唔在講，仲要呢方面嘅叻人實在好少，數數手指，香港得幾個，大部分係洋人，主要係幾間大律師行專做證券訴訟、糾紛排解同監管嘅阿頭。

嗰班阿頭級，年薪閒閒哋最少一球（即100萬）美金，施衛民個位舊年人工得600幾萬元，去證監做好大可能要減人工！

再講，呢行圈子實在細，律師行依家服侍開嘅客，分分鐘係證監「敵人」。去咗證監做嘢隨時綁手綁腳，所以你話幾難搵人呢！

咁證監大可向海外監管機構或者大銀行嘅法律顧問挖角？都喺嗰句，做得叻嘅唔係好多。

講番施衛民，好多人話佢過檔英倫，係因為「親密戰友」FCA阿頭韋奕禮嘅關係，如今馬田（韋嗰洋名）被迫下台，英國財相歐思邦又話FCA「要步入新階段」，暗示監管方向可能由嚴變鬆，咁施衛民去到英國仲可唔可以發揮「打虎」所長？絲絲等住睇。

余絲韻