絲絲講場:巨企主帥條命值幾錢？

保安費使得至抵嘅，應該係蘋果公司，佢哋教主庫克幫公司一年賺成500幾億美元，但用喺佢身上嘅保安費，都唔使70萬美元，超抵。

貝索斯過千萬 庫克超抵

至豪嘅係亞馬遜，佢哋用喺CEO貝索斯身上嘅保安費，每年超過160萬美元（逾1,248萬港元）；點解咁貴，佢哋話因為貝索斯人工低，得嗰8.1萬美元兼冇股份補償喎。乜人工低同保安有關係嘅咩？絲絲真係睇唔出。

星級公司嚟講，保安費至平嘅係Twitter位CEO科斯托洛，今年得12萬幾美元，咁少係有原因，事關佢因股價表現差，啱啱上個月落咗台。

朱仔闔府統請 股神慳家

講到乜嘢算係保護，咪以為只得人錬，或者香港出名嘅慈母式保護，人家護主會出動私人飛機。facebook嘅CEO朱克伯格就最盡，唔只佢自己，連親戚朋友飛都入埋落條保安數。

股神巴菲特就一貫咁慳家，佢用車唔入公司數，用公司飛機亦只限公事用，佢雖則係全世界第三最有錢嗰個，但保安費都只係花公司36萬幾美元！

余絲韻