即時通訊App LINE啲貼圖，可愛到呢，絲絲啲一Pair Pair嘅朋友，好多都中咗招或「被中招」，不時你係阿Brown熊大就我係Cony兔兔。記得舊年銅鑼灣LINE公仔展覽墟冚到呢，為咗買到LINE FRIENDS嘅精品，排隊粉絲多到打晒蛇餅。
過咗一年，又係時候考驗吓各位Brown同Cony嘅愛，事關為順應民意，希慎（00014）旗下希慎廣場同LINE再合作，LINE FRIENDS Pop-up Store（期間限定店）今個星期六（八月八日）就喺希慎廣場開張。
Pop-up Store就話有期限，但各位Brown同Cony嘅嗰份愛，又點能夠限定嘅呢。所以年底前香港就會有第一間LINE FRIENDS Store。
希慎副主席兼行政總裁劉少全話LINE FRIENDS Store最快第三季會喺希慎廣場一樓開幕，到時間舖會有兩間舖咁大。咁大家就唔使飛去日本、南韓同台灣搵Brown啦。
絲絲記得，首爾嘅LINE FRIENDS Store同東京店一樣，門口都有巨無霸Brown歡迎大家，香港店會唔會一樣有Brown做生招牌呢？嗱嗱嗱，絲絲絕對唔係Cony，亦唔係去朝拜，喺首爾同東京都純粹係咁啱行過啫。話時話，Sally到底係雞定鴨呢可。
余絲韻