雖然日圓呢排跌咗唔少，但日本生活指數之高，依然係全世界名列前茅，之但係當地最低工資竟然唔算高，喺經合組織（OECD）成員當中，只算中中哋，叫做多過西班牙少少，係時薪780yen，只夠食碗拉麵。
不過，好消息係，當地厚生勞動省呢排建議，將今年度最低工資加到798yen。若然成事，加多呢2.3%，多咗大嗱嗱18yen，斷估個拉麵可以加隻蛋或加塊叉燒。
唔好睇小呢18yen，小數怕長計，每年即是額外多咗3萬幾yen，相當於一般家庭去超市買兩星期嘢嘅錢。睇番尋日出爐嘅數據，日本六月份核心通脹僅升0.1%，家庭開支更大跌2%。咁睇最低工資確實有必要加。
話時話，人家780yen，計番港銀都有成48蚊，咁香港嘅最低工資時薪？得32蚊半，連食碗拉麵都唔夠。
余絲韻
