絲絲講場：債王：低息搞到通街喪屍

垃圾公司借平錢吊命

格羅斯話，呢幾年咁低息，連啲評級CCC-，即是去到垃圾級別嘅公司，都可以借平過5厘低息，吊住命唔生又唔死，於是通街都係呢啲喪屍公司。

至於高啲質素嘅公司，借到平錢，就只係用嚟回購股份，而冇將筆錢用落發展度，莫講話投資或者增加職位。

救唔到經濟反添亂

格羅斯話近年嘅回購潮，就係因為容易借到平錢搞出嚟。情況有幾嚴重？睇番○七年時嘅回購額係8,630億美元，已經叫做好高，依家？已經直頭去到成1.02萬億美元。

啲錢完全冇投放番入個市場度發展，冇新投資，幫唔到整體經濟，所以格羅斯話，低息唔係救經濟嘅解藥，而係麻煩嘅一部分。

超低息，仲會有乜後果？咪淨係掛住供樓平啲。嗱，格羅斯就話，超低息會削弱保險公司同養老基金嘅盈利能力同償付能力。貼身啲講，即係老咗，啲養老基金會唔夠食過世咁囉；高少少講，就會令金融市場普遍出現價格偏離。唔明？個世界邊得你明得晒。

就快變喪屍城，咁點算？好簡單，唔得嗰啲，拔喉，直接宣布死亡吧。

余絲韻