北水頭等倉：龍源電力有勢起動
滬港通行咗半年有多，但至今大部分時間使用額度仍欠活躍，在淡季更加無助帶動港股交投，當真令人失望。見昨日港股成交連800億元都冇，看來唔少基金大戶都高掛免戰牌。A股則繼續打滬綜指四千點保衞戰，昨日揚升2.4%以4,123點收市。不過，如今A股最重要係尋找回歸市場之路。
官方發出清楚訊息，現時並非談國家隊退市的適當時候。在不用擔心有大量供應要沽出市場之下，安全期炒家可以放心炒，只是大價股處業績期，惟有轉吼二、三線概念股。
大成系或有後着
昨日A股國企改革有人氣，港股相關概念股亦見有資金流入，如中糧系股份──中國食品（00506）及中糧控股（00606）分別升5%及4%，節能海東青（02228）升1%。到底講咗兩個幾月的國企改革頂層方案係咪真係就快出台，不得而知，但顯然一日未出，相關概念股都唔缺翻炒題材，到時到候又會撻着開車。
近日大成系股價異動，其中大成生化（00809）股價昨日再升15%，同系大成糖業（03889）亦升12%。呢系股份股價經已低迷咗成年有多，今年次季曾經炒過一轉，但一場大跌市又回落至起步位咁滯，冷不防咁又快又可以重新起動，留意會否有動作跟尾。
此外，新能源股中，龍源電力（00916）亦見異動，高位做9.25元，收報9.22元，升3%，成交達9,770萬元。早前公司公布上半年發電量按年增16%，比對行業平均水平算係唔錯，而經歷多次減息降準，相信有助降低財務成本。公司首季純利同比增長43%至10.29億元人民幣，相信中績亦會報佳音，可納入觀察名單。
技術上，10日線正醞釀抽穿50日線，若交投轉趨活躍，有機會再重遊10元大關，回吐宜守8.7元。
司慕渢