Market Insight：航空股炒重組概念

更重要係，主板成交連八百億都唔夠，並已返回三月底水平。基金經理一副你急佢唔急的態度，個市要返回26,500點大型蟹貨區底部，恐怕非要需要有九牛二虎的利好消息先至有機會。

莫非真係春江水暖？業績大戶狂掃友邦保險（01299），升2.1%收報51.45元，是七月股災以來收市新高，貢獻恒指39點佔大市升幅三分之一，目前街外預測上半年新業務價值（VNB）增長介乎20至22%，較樂觀估去到22%的美銀美林，預期友邦中國的業務會有可觀增長，目標價睇58元。

體品股悶市突圍

濠賭股是另一路升市奇兵，繼放寬中國旅客過境規定，全面禁煙吹風已經一段日子，擔心令賭業進一步受打擊，結果諗計以馬拉松諮詢及審議，最少拖多一年先實施禁煙。消息一出，金沙中國（01928）及銀娛（00027）升7.9%及4.5%，收報33.35元及34.8元。

不過，眼見博彩收入放緩情況未見大改善，近期的A股股災會唔會影響一班好賭大媽大叔去馬交的心情，仲有待觀察，現價相當於25倍及20倍市盈率，先機已失，再追落去值博率睇落唔高。

經歷七月八日股災之後，炒AH價差收窄的國企固然洩咗度火，有排醫，內地莊家鍾情的港A股，大都得番半條股命，唔少仲係吊緊鹽水，強如昨狂抽的阿里孖寶──阿里健康（00241）同阿里影業（01060），客觀同高位比較，股價其實至多去到山腰水位，但值得留意，有部分股份在悶極市況中，已靜靜重新上路，再次攻頂。好似昨日安踏（02020）股價升3.2%收19.58元，以收市價計創咗歷史新高。

最能受惠低油價

體育用品股經歷近四年的去庫存、減成本周期，唔少去年已經見到縮皮活動做得八八九九，業績漸漸恢復動力，開始有番批基金客捧場。破頂的安踏，早於去年業績回升，今年第四季訂單預告有高單位數升幅，最有保證炒高唔奇，反而連李寧（02331）都在高盛推介下，昨急升9.8%收報3.78元，同4元目標價收窄至不足6%。

基金TPG進駐的金珍君，月初先辭掉執行董事及執行副主席一職，李寧高管有咩符弗收拾爛攤子，古勝都係估估吓，照計無理由唔先去諗其他業績對辦或估值平平哋的股份，好似匹克（01968）及特步（01368）之流。昨日特步同順豐速運簽戰略合作，話要跨界整合，發揮「互聯網+」物流，加強線下銷售力度，得唔得就未知，但肯定短期會多個古仔炒。

今年，油金及貴金屬本來經已弱過藥煲，近排A股股災，加埋中國披露黃金儲備遠比預期少，商品市場插到七個一皮，連帶澳元同加元等商品貨幣都破晒位，油價掉頭跌穿50美元關口之下。受惠於低油價，航空股算係今浪最先嘗試挑戰七月初小股災前高峰的板塊之一，好似拉咗閘隻東航（00670），同七月八日低位比較，勁彈64%，差4.2%返到家鄉。

南航估值仍吸引

南航（01055）股價距離10.3元高位差13%，中國國航（00753）仲巴閉，停牌前三個多月股價在8.16至10.1元之間橫行，完全唔覺有出現過大屠殺。

航空股值博，一來估值仲係唔算高，好似南航預期市盈率11倍，比五年歷史平均13.4倍仲有折讓。航油下半年跟隨油價低位徘徊可能性相當大，與去年下半年仍是高基數相比，燃料成本大減對業績放大效果，至少維持至今年底。但更重要，三巨擘重組消息已久聞樓梯響，上月一個內地民航會議，民航局大員曾經放風，三間公司籌組一間全新貨運航空企業，務求打造成亞洲貨運一哥。

近期股價強勢，似係春江鴨所為，但衡量估值與重組可能，應該仲未炒完，現價依然值得跟番多少。

古勝