絲絲講場：無得打虎 韋奕禮唔忿氣
韋奕禮幾年前唔做證監會CEO，過檔英國金融操守局（FCA）做阿頭。點知，英國財相歐思邦上星期一句話FCA「要步入新階段」，韋奕禮未約滿都忽然要起身，九月轉做顧問，出年一月底都要走人。對於無得續約兼「被辭職」，韋奕禮前日終於開聲話好失望、好多嘢都未做完。即是壯志未酬、革命尚未成功，兼且仲好火嗰隻。
滿腹大計就咁泡湯
韋奕禮係FCA嘅開山功臣，FCA一三年四月出世咗幾耐，佢就做咗CEO幾耐。佢出咗名愛打虎，仲講到明會「先開槍，後問話」，總之一定要嚴管。有幾嚴？佢在位期間，啲金融機構嘅罰款，係以億英鎊計，see。
睇住啲老虎一隻二隻跳吓彈吓，但自己以後無得再打，韋奕禮梗係嬲。佢前日就針住金融市場連環發炮，話整頓投行文化，仲有排未得，大玩家之間互相交易，係咁將市場舞高弄低……blah blah blah。
韋奕禮仲話，原本仲諗緊想再辣啲出「禁止交易」呢招，作為罰款以外嘅「撒手鐧」。點知……打虎英雄的悲哀，絲絲都feel到。
英金融監管轉鬆？
換走咗強悍嘅武松，邊個接棒？未知喎。咁啱呢兩日又有風聲話，原本怕咗監管收緊嘅滙控可能會留番喺英國喎。唔通英國金融監管風向大逆轉？由嚴轉鬆？春江鴨於是唔使搬竇？
余絲韻