薦神:博雅向上仍有水位

上周中港股市經歷瘋狂過山車,雖然周四及周五大部分個股升得唔錯,但其實都係輸少當贏。既然睇唔通後市,就更加要短炒多幾轉,一於密食當三翻!

上周四軟件及網遊股反彈得唔錯,但網龍(00777)、雲遊(00484)及IGG(00799)周五都先升後回,反之博雅互動(00434)仍然升4.2%至4.38元收市,既然股價如此硬淨,當然要望多兩眼。

先睇基本面,雖然博雅早前公布今年第一季業績表現麻麻,純利按年下跌7.46%至5,759萬元(人民幣‧下同);收入則升10.1%至2.44億元,而當中網頁遊戲收入按年下跌8.9%至1億元,移動遊戲則上升28.9%至1.43億元,反映移動遊戲確實一如外界預期,取代網遊成為集團最大收入來源。

值得留意的是,博雅財務狀況良好,手持淨現金逾10億元,且截至去年底止並無任何負債,若然集團年內有併購活動,更有機會成為股價向上催化劑。

以上周五收市價計,其往績市盈率8倍,PB得1.8倍,估值既已屆吸引水平,不妨分注吸納,博重上6元,跌穿4元止蝕。

帥哥