想知廣告點落法先吸到客？依家要出動到神經科學專家。facebook都係靠佢睇穿用戶個心，即刻搵到最啱使嘅「呃Like」絕招。
問人個廣告點，同問「你有幾愛我」一樣，未必人人答得出，答得出亦可能係Hea答。身體就最老實無得呃，神經科學就係分析測試對象嘅心跳、出汗率、眼球移動、同腦部活動等，睇吓佢哋對廣告嘅反應同感覺。個廣告Work唔Work，立刻現形。
facebook委託嘅專家研究發現，用戶睇手機廣告，原來專心過電視廣告，兼且對內容接受程度高啲。理由？因為離個Screen近喎。仲有，想捉實手機族個心，一個字「快」，重點唔該頭10秒講晒，否則，Bye。
電視電影嘅植入式廣告，觀眾受唔受一樣Check到。時代華納舊年搵咗批觀眾，一邊畀佢哋睇名嘴Talkshow同劇，一邊Check住佢哋嘅面部同眼球活動，一吓皺眉一吓戚嘴，雖然肉眼唔覺，但植入嘅三星同M&Ms產品，究竟觀眾受唔受，立即無所遁形。
就係咁，著名廣告公司及評級機構近年不斷收購神經科學研究公司，神經科學好明顯已經係廣告界兵家必爭之地。
余絲韻