港股有丁蟹效應，原來A股一樣有類似嘅「神級效應」。每次佢出現，當日嘅滬綜指幾乎都會跌，輕則跌十幾點，重則跌幾十點到百幾點。佢，就係招商証券策略會。
策略會，好多券商都有開；不過有內媒發現，呢4年每逢招商証券開親，無論係年度定中期策略會，開會當日個市次次都跌咁滯。好似舊年十二月九日佢哋係深圳開年度策略會，當日滬綜指就重挫近164點，不過第二日就反彈超過80點。但唔係次次咁好彩，喺一一年十二月嗰次，佢哋開會第一日，滬綜指大跌42.95點，第二日仲跌多20點。
係唔係咁神？同好多嘢一樣，信則有不信則無。佢哋嚟緊幾時再開？就係今個月十六日同十七日。小心睇路。
余絲韻