絲絲講場：港股大時代未算係？

呢兩個月港股升咗唔少，有人直頭話港股似提款機，啲錢「極都有」。不過，兩位經歷過七十年代「大時代」嘅前輩同絲絲講，話依家邊算得上大時代，依家都唔係個個賺，同以前無得比。

「以前嘅大時代可以用『魚翅撈飯，雞犬皆升』嚟形容，依家都唔見個個人都有錢賺，七十、八十年代炒股容易得多」，六福金融主席許照中仲話，內地資金湧嚟造就大市每日成交破千億，只係港股新常態，但恒指連28,000點都企唔穩。

幾時先算真正「大時代」？證券界老行尊眾利股票主席董偉話「等深港通開車，話唔埋可能出現」，佢仲話「恒指最高都係見28,500點就腳軟，好多股份都未升過」，佢又話香港未去到瘋炒，不過，「如果見到啲人開始魚翅撈飯，就代表個市見頂，要小心。」前輩，收到。

不過，依家啲八、九十後，好多為保育問題向魚翅Say No，今時今日慶祝有斬獲，興食乜？鮑魚？「阿一鮑魚」富臨老闆楊貫一話，得股市帶挈，近兩個月生意額每月多咗幾十萬，升咗一成左右。

好似仲有和牛。法興環球股票產品部副總裁蔡秀虹（Eva）自己揸嘅安碩A50中國（02823）升咗兩成，上個月索性全家豪食宮崎和牛慶祝。

見賺，就連生日都Suprise啲。瑞銀亞洲股票衍生產品銷售部董事總經理于正人（Johnny）手上藍籌同中港股票ETF係長揸，只帳面賺，但Johnny話點計都要送份更好嘅禮物畀就快生日嘅太太，仲會暑假豪遊意大利。于太，聽到嗎？

見個市反反覆覆，心郁郁想炒多轉？元朗股神曾錦安話「以前見到罕有嘅古董錶，會忍唔住手買，依家留番啲錢炒股好過，之後賺番再買未遲」，佢仲話有個Friend原本無炒開股，上周用幾廿萬入市，望賺一倍換架靚車。咁即係見頂未呢可。

余絲韻

絲絲講場：港股大時代 未算係？