Market Insight：水泥股打翻身戰

唔經唔覺，四月初中證監放寬公募基金經港股通入市消息，輾轉已經差不多兩個月時間，恒指仍在27,000至28,500點之間橫行，連早前兩地基金互認，大市都係興奮得半日。指數目前在27,600點水平，在上落區中間落墨，實在唔算標青。

股市往往多數服從少數，當酒樓茶客及的士司機都變晒股票專家，以為一定會發生的，事實往往唔跟劇本進行。滬港通最初以為會將AH股差價收窄，結果通車前炒差價活動早就玩完，滬港通真正開行，差價反而因為A熱H凍，各走各路。

古勝冇點你

升逾兩成

大媽唔興隔山買牛

由AH差價指數顯示，家陣A比H平均反而高出三成。四月初，公募基金獲批經港股通入市消息，港股癲了兩日，港股通額度亦都罕有出現爆額。經過七個禮拜，要改基金章程基金，手續應該老早辦好，反觀港股通額度一連兩日都係用咗6億人仔左右。兩市大門打開，南來入貨基金卻是非常冷清，A股兩市成交仲係維持日日比港股多十幾倍的癲狂，在在反映內地基金及大媽對隔山買牛興趣唔大。

近兩個月多隻二三線暴升股，說穿了不過是少數內地南來，鍾意吼冷門的莊家以及本地炒鬼趁亂所為。

後市係升係跌，望國家隊嚟打救，不如睇番客觀環境。半年內，滬港通、人行減息降準、基金互認，阿爺奇招盡出，港股依然企住兩萬八樓下，未見經傳的二三線炒到出煙，正路藍籌卻維持行三步退兩步的姿態。唔少古勝所認識的缸邊客，都睇實下星期MSCI公布結果，望會將A股納入新興市場指數，為A股與港股沖喜沖喜。

MSCI公布結果難料

在下認為，如果問三年後入唔入到，答案幾可肯定，但目前似乎只係五五波。話就話為咗A股入MSCI，在引進外資方面下咗不少工夫，過去大半年A股升市，純粹大媽高興，畏高的外資仲係好審慎，滬港通的低成交可見一二。早排富時搞個過渡性指數放A股入去，純粹係順得哥情又唔想失嫂意之舉，反而令人擔心，依家期望咁大，兩融到頂入市新資金唔夠，萬一來個反高潮，港股唔跟升走去跟跌就弊。

傳統智慧話，大股東肯私有化自己公司，來來去去得幾個理由，一係睇好業務快將步入收成期，反之街外股東睇唔到，造成股票價值被市場低估，反映唔到實際利好條件；又或者流通量太低，發揮唔到資本市場作用。

去年台泥國際（01136）大股東以每股3.9元私有化，被股東投票否決，估唔到一年之後，出盈警提到上半年業績倒退外，仲來個二供一，每股作價只係2.2元，比私有化出價足足低43%，到底葫蘆裏賣乜藥？令人猜想有好嘢跟尾。

首季內地發展商施工量出現倒退，是近年罕見。水泥行業中，強如龍頭海螺水泥（00914）首季業績都要跌31%，台泥首季業績唔掂可說非戰之罪。隨着人行狂放水，樓市需求好番，加埋阿爺搞個「一帶一路」，基建救經濟，下半年水泥價格與需求點計都比上半年好。

台泥供股不妨參與

早排海螺提過二季業績已見復甦端倪，台泥高管也有類似預期，在業績走出黑暗盡頭，見到光明一刻先來個低價供股，確實惹人遐想。作較壞打算，下半年業績追唔番晒上半年，一五年盈利跌三成去到14億元（街外平均估19.2億元），未計攤薄PE係6.5倍，舊年大股東以6.4倍私有化失敗，無理由呢個價輸得死人。近排由3.5元隊落昨日2.79元，有貨記住供，古勝亦諗緊買番嚟供埋一份唔好執輸。

木薯資源（00841）果然盡顯貨乾本色，單日升四巴仙算係咁。再接再厲，有隻細嘢實在冇乜亮點，過去十個年頭，當中有八年都係蝕錢，證明本業唔多掂，而且頻頻抽水，唯一可取之處係市值僅得三億多啲，而且大股東持股近七成，好明顯具備咗靚殼的重要元素，不排除在港股大時代有大孖沙相中，咁就發達囉，使乜捱得咁辛苦，現價毫零子博翻一番，最多擺低10%啫，咁究竟係邊隻呢？咪華建控股（00479）囉。

古勝