全世界嘅阿爸阿媽都有個共同敵人，就係遊戲機。一見到仔女打機，唔鬧都至少哦幾句。不過，facebook CEO朱克伯格最近好認真咁公開講：想仔女大個做到電腦工程師，家長應該畀仔女細時打多啲機，佢自己就係最佳人辦。好嘢，以後仲唔攞正牌打機！
諗多咗啦，朱仔講緊嘅其實唔止係打機，而係寫Game。佢大概十歲時得咗部電腦，由於佢超鍾意打機，打到想自己寫隻Game嚟玩，於是學寫程式。成件事就由扔雪球開始，話說佢想玩扔雪球但無人理，索性自己寫隻扔雪球Game，就係咁得咗。從此家姐細妹唔使怕畀佢雪球掟親，而佢就一隻隻Game係咁寫出嚟。
朱仔講到明，嗰陣若佢無打機，就肯定唔會去學寫程式；多得打機，佢先有興趣自學，佢仲話大部分佢識嘅世界頂尖電腦工程師，其實都係靠自學。
其實只要識得發揮，打機一樣前途無限。A股游族網絡嘅CEO林奇，細個已經係「Game癡」，大個創業就決定做「自己最會玩的網遊」，公司喺內地主板仲上埋市。
香港都有個90後「打機狂」鍾培生，大學畢業後放棄做投行，自己開公司轉播網絡遊戲同舉辦賽事，仲已經有創投基金注資。
不過，無論林奇定鍾培生都話，齋靠打機唔夠，點都要顧埋學業，林奇仲話全靠老竇鬧佢「不好好學習，將來就只能去挖煤」，佢先識得發力讀書。就算你係打機天才，冇學識又點發揮？如果一心諗住望實個Mon打機就會成功，都係一句：諗多咗啦。
余絲韻