絲絲講場：維達股東會勁有掃貨feel

豪送贈品 紙巾任攞

維達尋日開股東會，公司高層全程笑容滿面，皆因維達季績佳，小股東一樣開心咁無比，皆因維達豪住送贈品，小股東一個紙袋一個紙袋嘅維達紙巾任攞，隨你一個人兩隻手攞得幾多就幾多。

小股東去股東會係為咗撐公司，好明顯一定係啦，絲絲點敢懷疑。嗱，嚟撐公司之餘，公司仲畀埋掃貨Feel你，咁情況下，小股東份熱情，就梗係連尋日嘅黃雨都淋唔熄。

點熱情法？有小股東就一個人一口氣攞咗十一袋嘅維達贈品，絲絲見佢咁熱情又咁撐公司又咁高興，都同佢傾番句。小股東話自己喺維達招股嗰陣，就已經買入維達股票。呢十一袋呢，佢話係「幫朋友攞」嘅。絲絲現場所見，維達嘅小股東係零舍夠義氣嘅，好多都好幫朋友。

余絲韻