Market Insight：做功課避股市陷阱

市場繼續買定花生睇暴動股，繼周三漢能（00566）急跌後拉閘，昨日輪到另一神股高銀孖寶插水。高銀地產（00283）及高銀金融（00530）午市一度插過六成，收市分別跌40.9%及43.3%。前日古勝講話港股A股化之後，日日都有一堆暴升暴瀉股，陷阱唔少。不過，如果唔係畀貪念蒙蔽雙眼，做些功課，都未必會買呢一類股票。

光伏股霉氣未消

好似上述提到的三隻股票，股價狂瀉前，市值最高去到3,783億、1,052億及2,471億元，佢哋過去一年的盈利紀錄，只係賺33億、8.5億及7.3億元，高達114倍、123倍同338倍PE，就算叻到好似騰訊（00700）咁快盈利增長，再乘二都覺得貴，根本很難長期支持咁高股價，受地心吸力影響只係遲早問題。

依家個市大時代，講基本因素實話唔啱聽，亦都未必可幫看官搵到一啲可以短期以倍數上升的暴動股，但至少可以避過這一類股市地雷，否則趁牛市賺埋幾多都無用，踩中一隻實一鋪清袋。

漢能急瀉後影響力猶在，光伏股仲未止跌，昨日聯合光伏（00686）、保利協鑫（03800）、卡姆丹克（00712）及陽光能源（00757）跌幅介乎2至4%。美銀美林話今年多晶硅及硅片價格比預期更疲弱，調低保利協鑫今明兩年每股盈利預測8%及7%，目標價由2.8元降至2.6元，仍比昨日收市價2.11元高23%，維持買入評級。

中策集團（00235）準備2供1股，同場加映70億股配售，集資最多15.5億元，供股價與配股價都係0.15元，比前收市0.295元折讓近半。開市恐慌隊過一陣，散場前同靚佬湯套舊片名一樣──「最後無事」，由最多跌21%拗腰倒升18.6%收報0.35元。

睇番今次係中策一年內第二次又供又批，一○年買唔成南山人壽後，去年底止12.6億元資產大部分係現金，除了把現金放貸，基本上同殼股無分別。早幾日公司同華聯簽備忘錄，收購擁有內地網上購物網站hloto.com七成五股權，準備動用20億元。

中策部署大變身

若加埋今次伸手要錢，應該同收購變身網股部署有關，以現時大約5億元殼價，加埋佢手頭現金17.6億元左右，未計新股前市值19.6元億，溢價唔算多，兼且昨日收市前氣勢咁盛，睇嚟炒家可以望多幾眼。

二月至今招股上市的新股，八字頭加全配售的升到離晒譜就係人都知，昨日篤篤吓機，見有隻四月底上市新股昊海生物科技（06826），居然喺大牛市中挾着179倍超購，今時今日仲潛緊水。當然立即吸引在下貪平的心態，望多幾眼。

瑞銀保薦上市的昊海，主業包括研發、產銷醫用可吸收生物材料，目前十四種生物醫藥產品，主要用於骨科、防黏及止血、眼科創面護理及組織填充等，產品經由全球千三個經銷商，覆蓋內地所有省市，經銷的三級及二級醫院覆蓋率分別九成及四成。過去三年產品毛利率維持在83.4至87.2%水平，純利由一二年1.13億元人仔，升至一三及一四年的1.41億及1.83億元人仔，增幅相當強勁。

昊海大價受忽視

不過，呢期個市鍾意玩供求，睇番昊海配售4,000萬股H股上市，從彭博資訊，Schroders、Prudence、Dragon Billion China幾個基金股東坐住嘅貨，佔去配售股份超過三分之一。再睇上市首日，超過1,800萬股份易手，會唔會落入強者手，大家都只係估估吓，但首兩日之後，成交縮晒，貨乾表徵明顯，因股份大價關係，相信散戶參與興趣有限。

昊海以59元招股，依家股價57元處於微潛，27倍PE對同A股炒到過百倍的生物科技股，相對容易入口，昊海點解唔行？確實莫名其妙，但睇客觀條件，值得記存。

贏一成六

帥哥昨日推介正峰（02389），股價旋即爆上，即市高位1.35元已突破首站目標，高低位計累升16%！

古勝