絲絲講場：港交所帶旺埋馬場？

近排股市咁過癮，唔少馬迷刨少咗馬經，轉揸鑊鏟。尋晚快活谷跑夜馬，咁啱第五場就係一年一度嘅香港交易所盃，港交所近期股價好似坐火箭咁，馬迷唔知會唔會因此落重啲注，沾吓港交所啲旺氣呢？結果，跑出嗰匹頭馬叫「人和家富」，捧盃位馬主係張明敏，係呀，就係唱《我的中國心》嗰位張明敏。

港交所呢排風頭一時無兩，兩位話事人周松崗同李小加尋晚都有落場頒獎。以往舉行港交所盃，港交所都會請業內人士食番餐聯誼吓，唔知係咪今年股市大旺，個個心情特別好，今年業界反應特別踴躍，有成一百七十幾人出席，要開成十幾圍至夠。

尋晚出席飯局有好多係積極參與滬港通嘅經紀行，港交所今次靠滬港通食胡，港交所梗係要答謝吓佢哋！

余絲韻