Market Insight：敏華有勢突破阻力

昨日三大藍籌內銀股升幅介乎1.6至1.9%，合共貢獻大市69點，佔昨日恒指升幅八成七，連埋瑞銀唱好中移（00941）貢獻的33點，成個市畀四隻中資藍籌推郁。

昨日有兩隻新股登場，內地動漫公司華夏動漫（01566）開低後企穩，收報3.72元比招股價3.65元升1.9%，以息誘作招徠的香港寬頻（01310）收報9元，與招股價相若，反而早一日掛牌、有373倍超購的春立醫療（01858），貨乾下突然發威，挾升13.9%收報16.3元。

古勝冇點你

萬里長空

智能手錶叫座不易

蘋果公司的Apple Watch帶動周邊股份的餘勁猶在，瑞聲科技（02018）收53.85元，微升0.1%，就算手錶無影相功能，在近期大行報告狂推下，光學鏡頭生產商舜宇光學（02382）再升4.8%收14.56元。先要利申，古勝作為果粉連日都無介紹相關概念股，皆因在下都未搞清，一隻需要先擁有iPhone，才可以完全發揮功能的手錶，同太陽能電筒有乜分別，尤其智能電話功能性上面早已大大超越手錶的範疇。

全球N咁多電子消費品巨擘都在可穿戴設備上慘遭滑鐵盧，當然在下都望蘋果公司可以成功，但要真金白銀追Apple Watch概念股，都係慳番荷包改買部MacBook玩吓好過。

基金股敏華控股（01999）年初至今股價介乎6至7.15元之間上落，二月尾開始見公司密密回購，可以視為五月公布的成績表理想的先兆。昨日收報6.88元升2.2%，似乎短期有機會挑戰長方形橫行區的上限阻力位。敏華主要從事梳化生產、批發及出口，近期積極開發售價及毛利更高的內地零售市場，最近分析員表示公司一、二月生產數字都比預期理想，隨住天津新廠房設備使用率向上，將會為一五年下半年至一六年業績提供動力。

慷慨派息成為賣點

睇番敏華業績自一二年見底之後，近年表現相當理想，純利由3億多元升至一三/一四年度的9.76億元，截至去年九月底的半年賺5.56億元，如無意外，全年業績會達到11億元左右。中期出口美國佔營業額五成五，在美國經濟復甦表現冠絕全球，加上美匯強勢，應有利中短期內維持較高的出口增長。

另外，慷慨派送是敏華的大賣點，過去維持41至46%盈利派息比率，基於現金充裕，中期坐擁26.9億元現金，減短債後淨現金近20億元，有助維持理想派息比率。

今個星期，歐洲央行正式開始每月600億歐元買債計劃，印錢之路預期會一直執行直到歐元區通脹返回2%樓上，或一六年九月期限屆滿為止，意味着歐央行最多會向全球金融市場泵水1.14萬億歐元。

今次歐洲版QE，會唔會好似美國QE3咁勁，將美股推高四成三，市場上睇法各異。一來啟動前歐股已經累升咗唔少，今年表現一枝獨秀，實際操作上，亦有質疑歐央行的長期再融資操作（LTRO），已經等同出咗QE。

同時，今年撞啱美國退市，預計年中有機會啟動第一次加息，而美、英兩國金融監管機構，又要求銀行資本充足比率遠高於《巴塞爾協議》最低要求，形成歐洲一方面放水，美英另一方面吸水的情況，令歐元鈔票水浸全球的威力減低。

聯儲議息等睇好戲

姑勿論點，歐央行QE前，歐洲國債二手市場已經癲定先，到昨日以德國為首的十個成員國，兩年期短債息都經已出現負利息情況，套息資金瘋狂湧入美元資產，形成歐元兌美元愈跌愈急，由去年十二月1.25眨吓眼已經連1.05關口都穿埋。

依家古勝最關注兩件事，一係歐元短期會唔會連一算都穿埋，下周美國聯儲局議息聲明點講，會相當關鍵，如果真係修改「耐心處理」加息的字眼，美元美債再爆多一段，絕對唔會係無可能；其次係美元狂升下，對美國企業出口壓力及通縮風險會唔會靜靜咁增加，對股市造成不良影響，又睇睇下周聯儲局主席耶倫點樣去管理市場退市預期，用文字去走鋼線。

古勝