內地巨富大連萬達老闆王健林又買新玩具？絲絲聽聞，王巨富想收購「紅黑軍團」AC米蘭足球俱樂部三成股權。
要使幾多錢？傳聞話要成1.2至1.5億歐元，即係大嗱嗱10.5億至13.2億港幣！聽講佢已經同班主貝魯斯干尼間控股公司傾緊點收購，似乎志在必得。
王健林一向愛足球，就係人都知，冇幾耐之前，佢先用咗4,500萬歐元買入西甲馬德里體育會嘅兩成股權，仲做埋第2大股東。只不過諗唔到，咁快又傳佢買第二隊。
王健林佢除咗曾經係內地首富外，仲係福布斯富豪榜排名第42位。不過，論到無人不識，佢位公子王思聰先至厲害，王公子言論大膽出位，公子早排嘅「擇偶胸大論」，仲搞到畀內地官媒不點名批評。
阿爸王健林早排上央視節目時就解釋，話個仔只因讀完「番書」，所以諗到咩就講咩。王健林之所以咁着緊為個仔大力護航，無他嘅，驚動到官媒批評，就唔係講笑。
余絲韻