絲絲講場：大行入鄉隨俗派利是

農曆新年假期剛過，又要返工嘅打工仔，最望收到老闆封開工大利是，新一年「利利是是」，工作順利。原來連外資銀行今時今日都入鄉隨俗，羊年開工第一日就即落分行派利是。

星展係新加坡公司，而佢哋嘅香港CEO龐華毅更加係厄瓜多爾人，但原來佢年年都跟足華人傳統，向每位香港員工派開工利是。除星展外，花旗環球個人銀行服務總經理林鈺華，亦帶埋財神一齊落中環會德豐分行派利是，祝班員工羊年「喜氣羊羊」、萬事如意。

銀行吸客無停手，滙豐就趁新春之際推出百萬抽獎活動，凡係全面理財總值100萬元以上嘅全新卓越理財客戶，都有機會贏取100萬元現金；不過，幸運兒就只係得一個。絲絲睇嚟，中獎嘅難度分分鐘同中六合彩差無幾。

余絲韻