絲絲講場：內地客買醫保如撲奶粉

絲絲一向愛揸「高息股」，恒生業績新鮮出爐兩日，派息加咗少少，但係內地壞帳好似多咗啲啲。內地投資風險高，大家都知，但有危先有機，恒生「一姐」副董事長兼行政總裁李慧敏（Rose）話跨境業務其實仲有好多發展機會，其中內地客對醫保嘅渴求，有如撲奶粉！難怪Rose一於繼續睇好內地發展。

嚟香港工作嘅內地企業高層，幫襯銀行時，當然唔止睇中銀行可以幫佢保管存款咁簡單啦！

Rose話，內地客對買醫療保險、做體檢、搵個好醫生等等嘅需求好大，簡直同排隊買奶粉一樣咁殷切！所以，恒生就同保柏簽咗10年獨家醫療保險分銷協議，用全方位360度嘅貼身銀行服務嚟留住大客。銀行如果要突圍而出，計Rose話，一定要喺服務上着手。

恒生往年就喺深受內地客歡迎嘅新界區，好似屯門、元朗、荃灣咁，開多咗分行同財富管理中心。舊年加加埋埋，恒生都請多咗336人。今年呢？Rose覺得人手需求會仲多過往年添。

余絲韻