絲絲講場：四叔拜年指點財路
仲有十日左右就過年，近排地產股升到嘭嘭聲，而舊年開始叫人買地產股的恒地（00012）主席、人稱四叔的李兆基，聽聞佢新春一如往年會出埠過節，至於今年嘅新春賀詞，係「祝願羊年，香港和氣生財，百業興盛，人人安居樂業。」
一直唱好地產股呢兩年跑贏樓價嘅四叔，身體力行集中買佢兩隻愛股恒地同新地（00016），由舊年年頭密密買，到依家臨近業績期先至暫時停手，帳面計已賺咗好多，雖然對四叔嚟講只係濕濕碎，但贏咗牙骹去度假，相信係祝願羊年和氣生財最開心。
四叔賀詞當中「和氣生財，百業興盛」最有玩味，香港經歷佔領事件，都希望各界可以一團和氣，經濟跟隨好轉，咁就各行各業都可以興旺。
恒生出動明日之星
至於「安居樂業」，現時樓價屢創新高，睇怕都要政府同地產商加強合作，妥善規劃及增加供應來解決問題。
仲有唔夠兩個禮拜就過年，恒生銀行（00011）行政總裁李慧敏尋日聯同一班高管，齊齊Chok住同大家拜個早年，祝大家「恒年健康、生財納福」咁話。
除咗一班大家都見慣見熟嘅高級管理層，好似馮孝忠之外，仲有四位青春洋溢嘅MT，呢幾位明日之星真係令到絲絲眼前一亮！
余絲韻