「富二代」經常都畀人認為佢哋嘅成功全靠家族嘅支持，先可以喺商業社會暢通無阻咁發展，個人嘅實力都只不過係次要。
不過，聯想集團太子女柳青就以行動嚟打破呢種誤解，佢剛剛由內地著名嘅打車App滴滴打車嘅首席營運官晉升為公司總裁，即係CEO，全面負責公司日常業務運作。
其實柳青原本係高盛亞太區總經理，上年七月先加入滴滴做COO，喺短短半年間，唔單止成功喺滴滴站穩陣腳，帶領公司喺管理同實務上都更上一層樓，更重要嘅係佢幫助仍未上市嘅滴滴完成了一筆高達7億美元（約54.6億港元）嘅融資。有咁強嘅實力，難怪公司急不及待升佢做CEO，等佢可以更全面咁發展公司業務，早日實現上市目標。
相信嚟緊都有好多人同絲絲一樣，會密切留意住呢位新任CEO嘅表現，睇下佢會唔會再帶更多驚喜畀大家，做個打破傳統嘅「富二代」。
余絲韻