早前facebook（fb）壞機成為城中熱話，咁大家又知唔知，原來啱啱過咗嘅星期三（二月四日），係fb面世（○四年二月四日）11周年嘅大日子？呢11年間，fb（同埋fb嘅投資者），又經歷過幾多苦與樂呢？
絲絲屈指一算，fb經歷咗4,018天之後，今時今日已發展成為一間擁有13.9億每月活躍用戶、市值超過2,110億美元嘅納指上市公司。而fb生日嗰日股價收報75.63美元，比起一二年上市時嘅招股價38美元，升咗近一倍。
講開fb，豐盛金融資產管理董事黃國英（Alex）管理嘅基金都持有fb，依家佔基金組合唔夠2%。雖然比重唔算好多，但原來佢仲持有fb相關Call輪，行使價分別大概係100同140美元，出年一月先到期。
Alex同絲絲分享，話今年fb係投資期，短期無大升催化劑，向上80美元有阻力，但72美元又有支持，暫時都唔諗住加注。但佢話社交媒體仲係未來嘅大趨勢，依然睇好fb長線表現，又認為fb係有較高成本效益嘅宣傳平台。至於有人話fb成日亂買嘢，Alex就反駁，谷歌等科技股嘅研發開支都好驚人，只係大家將資源用喺唔同地方。
fb今年表現係點未知，但太過沉迷玩fb就可能唔係咁好，因為美國就有研究話，對住fb太耐會易患抑鬱，大家都係適可而止。據美國密蘇里州哥倫比亞大學嘅研究人員們發現，妒忌fb好友會導致抑鬱。呢項研究基於對700名大學生嘅調查指，如果你抱住討厭嘅心態瀏覽fb好友漂亮嘅度假照片，或者購買嘅高價商品，會令你心情低落喎。
余絲韻