Market Insight：電力股暫時咪沾手

降準消息下，四大行「工農中建」股價升幅介乎1.6至1.9%，美銀美林話未來每降準50點子，內銀股淨息差會有1至2個基點的好處，盈利增長則稍低於1%，睇落唔算多，不過多少紓緩信貸質素下滑風險，亦預期未來幾年，存款準備金率仲有多次的下調可能。

不過，相對上美銀較為睇好內險股，雙位數新業務價值增長外，將會受惠於A股狂潮，投資收入有可觀增長，其首選係平保（02318）及中國太保（02601）。

古勝冇點你

萬里長空

人幣貶值迎貨幣戰

今年金融市場最熱門話題係貨幣戰爭，在各國央行鬥貶值之下，中國終於都無法置身事外，減息後再來降準，睇嚟第三波無可避免，係畀人民幣有秩序貶值。事實上，自○五年匯改以來，人民幣兌美元匯價，由8.27算輾轉去到舊年年初的6.04水平，咁多年至累積升值兩成七，睇落唔算好誇張。

不過，古勝唔少做廠的朋友都呻，過去十年內地最低同實質工資，年年最少升一成，做出口生意的廠商，慳到死都抵銷唔到不斷上漲的勞動力成本，形成唔少中低技術生產，已經轉到中國以外的新興市場，要刺激出口，維持製造業的活力，恐怕最直接都係加入競貶，畀延續了九年升值潮的人民幣匯率，慢慢停落嚟，並最好趁貨幣寬鬆周期行返轉頭。

今年的投資主題，可能係低息口及匯率回落的受益者，內房是在下第一個想到的選擇，本來高息的電力股都可以諗諗，殊不知昨日內地媒體報道，發改委短期可能會調低上網電價，達到每千瓦時3分人民幣，相當於6%的減幅。

消息比大行估計來得早，幅度亦比預期大（街外估緊減2分！），睇來得一個可能，阿爺搵電企祭旗，幫手承擔吓社會責任，畀終極用家較低電價，支持保七大計，亦都幫幫谷極都谷唔起的天然氣發電，等後者產電設備使用率改善。

吉汽再獲大行唱好

昨日華潤電力（00836）跌6.3%，中國電力（02380）、大唐（00991）、華能（00902）及華電（01071）跌幅介乎9.1至10.4%。先撇除電力股累積升幅唔少，引起基金殺機，一有風吹草動已急急食胡，亦反映中資股票，要揣測阿爺心裏想乜，巨大政策風險下，一切可炒唔可揸的實況。

收市後，吉利汽車（00175）公布一月銷售數據唔錯，總銷量5.888萬輛，按年大升76%，按月有7%升幅。早幾日，摩通分析員試駕吉汽新款GC9後，出報告話今年銷售超額完成信心增加，調高今明兩年盈利預測12至16%，以今年11.5倍PE計出4.3元目標價叫增持。若今朝開出升幅唔過分，可以留意。

中央反貪，內地豪客減少，澳門博彩貴賓房生意大不如前，濠賭股股價已經告知一切，跌到無底一樣，近期又話賭場全面禁煙，真係唔知幾時至跌到落底。較意外係，一直打着吸引中國豪客旗號，柬埔寨賭業股金界控股（03918），全年業績看來影響相對輕微。

芬佬對金界抱觀望

越南及老撾佔訪柬旅客比重三成，高於中國客佔比的一成三，不及澳門側重內地客，估計是減低中國經濟因素衝擊的主因。金界去年盈利跌3%至1.36億美元，旗下NagaWorld設置的博彩機，一三年獲退還1,500萬美元電子博彩機進場費，一四年再無同類退款，撇除影響，實際有9%增長。期內，博彩總收入及貴賓博彩收入分別升23%及41%，大廳賭枱收入有21%增長。

金界業績同大行預測差無幾，預期13倍PE，未來業績增長，關鍵是佔地12.3萬平方米，相當於一期酒店及賭場面積1.5倍的Naga2，在一七年投入營運，不過，工程由大股東先墊支，代價是一批可兌換15.6億股（相當已發行股本22.8億的68.4%），換股價1.83元的可換股債券，明年底被行使股數大增。

Naga2能否成功複製現有賭場的成功？過去大半年股價橫行尋底，一來受澳門賭業影響，但相信亦係因為唔少基金經理，對兩年後新賭場營運成敗抱觀望態度所致。

古勝