期指觀瀾：好友顧忌A股回調
一如所料，長實（00001）及和黃（00013）的破天荒重組頂住成個港股，意外係其他股票相當弱勢，昨日整體大市下跌股份有988隻之多。好友只能輕嘆，點解好消息永遠在唔太理想時間出現，港股繼續悶死人唔使本。
昨日期指相當chok，早市在24,096點遇阻後，曾被淡友攻到落23,897點，去到午後才能逐漸升返24,000點心理關口樓上，但即市去到24,054至24,062點又頂到實。好友對美股投鼠忌器，加上滬綜指跨周末的調整，都令到港股好友唔敢放膽入市。
期指日市收24,049點，國期收12,052點，成交分別為4.4萬及6.3萬張，一直等待國指回試11,800點支持，但昨日明顯見到好友在11,900點築起人肉長城力抗淡友，揸住12,000點的好倉，想加注得個睇字。
不過，有人用理性地不亢奮去形容近期港股，筆者認為相當貼切。港股大孖沙完全漠視A股強勢，到今日滬綜指RSI漸見頂背馳，有向下俯衝之勢頭，一直唔跟升的港股是否依然故我唔跟跌，抑或跟住插，是期指玩家所需要考慮。刻下僅以三分一注碼入市，心理上比較輕鬆，除非國指破11,800點完全無力反撲，否則維持好倉唔郁住。
John Mullen