A股熱潮繼續停不了，戰友已經索性高追中石油A（601857.SH），也不買中石油H（00857）。付出五成溢價，從投資角度看當然是反智，偏偏實戰上炒A股貴買貴賣不斷有着數。反正是短炒，當然是應該去鬥癲，其實我們喪追A50期指及ETFs，何嘗不是付出了一個高溢價？
從AH差價可見，外資並不認同A股的水位，但A股主場是屬於國內炒家的，閂埋門鍾意點開就點開。由於愈來愈多人識時務去趁墟，令港股出現劣股驅逐良股的怪現象，在目前這種難以make sense的市況之中，中長線預測意義不大，正路一定是趁機收集良股，但無人知仲要跌幾多跌幾耐，亦無人知A股幾時才會出現疲態，大幅調整。
於是操作的方法便變得很短，一路跟風，但有理無理，有利潤就袋住先。其實A股市場的天量成交，正正反映內地股民的打法同樣是不停出出入入，食完呢隻換另外一隻，令走勢長期此起彼落。而正如之前所講，自己對於港股的策略是買兩三個月後到期call，簡簡單單博港股發力追落後，除非港股動力明顯改善，否則不會加注。
至於美股今年依然睇好，可是看來可能改由零售主力領軍。大除夕的調整無人當作是一回事，但每逢一個新季度開始，市況都會相當混亂，預期未來一兩周會十分波動。就算是長期做好，目前要控制好注碼，有機會先來一個有如過山車的回合。
板塊方面，除了零售，自己開始燒冷灶揀石油股，行業低潮，往往是強者擴充勢力的機遇，加上股價明顯壓力減退。不過中資石油股級數不足，一心長期投資的話，必然是向歷史悠久的外國行業龍頭入手。
豐盛金融資產管理董事 黃國英（作者為註冊持牌人士）