孖妹Ｓ檔案：睇通招股書 穿梭股壇歷史

王牌經紀講招股書史

蔡：香港證券商協會永遠名譽會長兼中潤證券主席 蔡陳葆心

許：六福金融主席兼行政總裁 許照中

許照中指，八七股災後金融市場規範化，招股書亦愈寫愈厚。

蔡陳葆心表示，七十年代的招股書只得幾頁紙。

Kitty： 我喺夢入面見到嘅招股書，本本都厚到成舊磚咁！唔知以前嘅招股書又係點？

蔡： 我喺七十年代初入行做證券經紀，嗰時嘅招股書只係得張紙咁薄，最多都係得幾頁紙，邊似得依家啲招股書，有成幾百頁咁厚！除咗招股書之外，以前啲公司仲會將招股詳情及公司資料，用全頁廣告嘅形式刊登喺各大報章。

許： 我以前喺證券行做資料搜集員，成日都睇好多招股文件，仲會將「報紙版本」用File（文件夾）保存好。當年嘅上市規則無咁嚴格，招股文件都無今日咁詳細，但八七股災後金融市場逐步規範化，開始奉行「披露為本」（Disclosure based），上市團隊唔想因為有資料甩漏而影響上市時間表，結果本招股書愈寫愈厚，好浪費資源，我亦好難再搵地方儲起佢哋。

七十年代新股黃金期

彩兒： 聽聞以前新股市場氣氛比依家更熱鬧，而且啲招股書又薄又方便攜帶，應該好搶手啦！

蔡： 咁又唔係喎，其實一直都無乜人睇招股書，更何況七二、七三年嘅新股市場咁瘋狂。今時今日嘅大藍籌，好多都係嗰時掛牌，嗰時新股市場非常熱鬧，幾乎隻隻新股都大升，九成有錢賺，抽中咗就發達喇！由於每本招股書都會夾住一份申請表格，所以份表格先最值錢，仲邊有人理本招股書？

許： 當年最街知巷聞嘅新股，就係喺「九龍會」（即九龍證券交易所）上市嘅香港天線，股價由1蚊升到30幾蚊，所以人人都叫佢做「香港黐線」！

Kitty： 當年嘅股友靠抽新股大勝，話唔定都同我一樣，連發夢都夢見招股書，哈哈。

封面平衡實際與美觀

曾：縱橫公關顧問集團主席 曾立基

彩兒： 你喺財經公關呢行打滾逾廿五載，公司亦幫過近300間企業搞上市。喺招股書「出街」前，你哋點樣幫佢執靚啲？

曾： 公關參與製作招股書時，最緊要係個封面，唔係淨係要靚，因為監管機構規定封面設計要清楚顯示公司嘅主要業務，甚至係業務比重。例如間公司係賣傢俬嘅，當中只有1%收入來源係按摩椅，咁就唔可以將按摩椅放喺封面，擔心會誤導投資者。圖像及概念化設計都好常用，例如一啲好出名嘅科技資訊企業，佢哋嘅Logo就變得好值錢！

另外，招股書係法定資料，但唔係人人識睇，所以公關嘅責任，就係要令大眾更易明白公司業務、運作及前景。以前嘅招股書會有幾頁彩圖，將公司嘅生產基地、零售點等用地圖顯示，或將數據變成圖表。不過，要投資者喺短短幾日內睇完本招股書的確有難度，加上機構投資者嘅佔比多咗，所以依家公關會花更多比重喺其他宣傳途徑。

有既定框架難「瘦身」

Kitty： 孖妹班姊妹成日嫌棄本招股書厚、內容又悶又累贅，你哋有無打算幫佢積極瘦身？

曾： 其實招股書嘅內容都係由投行、律師行負責，每本招股書內容嘅涵蓋範圍變化都唔大，因為本身已經有既定框架。一般而言，海外國家首間來港上市企業嘅招股書會厚啲，因為要詳細交代當地法例。好似一○年初上市嘅俄鋁（00486），就係首間香港掛牌嘅俄企，佢本招股書中、英文版本加埋有10.5cm咁厚！

其次，亦會視乎公司嘅業務及市場規模，如果係某個行業嘅上市「先行者」，行業資料、風險等內容都需要更詳細披露。

彩兒： 我知你哋公司有個招股書「書庫」，收集咗過千本招股書，不如帶我哋去參觀吓吖！

曾： 我哋有兩位同事專責定期打理呢度o架。儲招股書主要係為方便參考，即使唔係我哋嘅客，我都會儲，因為你唔知間公司幾時會成為你嘅新客。

彩兒、Kitty

若有料報畀彩兒同Kitty或有嘢問，可電郵money.biz@on.cc