絲絲講場：雷軍坐金山打造一舊雲
小米科技董事長雷軍同時亦都係金山軟件（03888）嘅董事長，當年金山嚟港上市，雷軍出力不少。其後雷軍因為要全力打造小米成為可以媲美蘋果公司（Apple Inc.）嘅智能手機王國，於是淡出金山。不過，雷軍身為金山人，自然唔會忘記金山，佢啱啱就公開未來三年戰略重點是旗下從事雲技術開發嘅「金山雲」，承諾在未來3至5年內將向雲業務投入10億美元（約78億港元）。
好似近排，金山軟件就聯手小米，同埋新加坡淡馬錫一同入股中國最大互聯網基礎設施服務商世紀互聯，呢個咪係雷軍稱呼為金山「All-In雲」戰略嘅重要一步。
3年戰略谷All-In雲
雷軍指，已制訂了「All-In雲」嘅三年戰略，因舊雲會是金山業務開闢新局面嘅關鍵突破口，大拿拿10億美元嘅前瞻性資金投入係完全值得嘅，而早前投資世紀互聯就係其中關鍵嘅一步。世紀互聯主要提供數據中心託管、雲計算等服務。按各方達成嘅合作協議，未來三年，金山計劃至少租用5,000個機櫃，世紀互聯成為其提供數據中心支援嘅重要合作夥伴。
小米瞄準一條龍平台
其實，就絲絲所知，雷軍除了金山雲會大搞之外，其實佢終極目標自然係將小米打造成一個一站式互聯網平台，透過呢個平台，出售小米智能手機，以及各式各樣的互聯網接入服務。好似啱啱咁之嘛，小米就孖住京東等電商同內地風投基金，對美國硅谷嘅可穿戴設備初創企業Misfit投資咗4,000萬美元，是次仲係小米等中資企業首次投資美國硅谷企業。而Misfit生產嘅運動數據和睡眠追蹤功能嘅智能手環Shine，據講喺內地係最好賣嘅。睇怕雷軍亦會引入Shine嘅技術，改良小米智能手環，一齊拍住上啦。
余絲韻