Market Insight:內房股趁高食胡

今個星期,睇實個港股飄到咁,缸邊客唔食定暈浪丸都恐怕頂唔順。周一個市無情白事狂插620點,周二好番些少,內銀同內險帶住恒指反彈286點,昨日又失驚無神隊225點,恒指收報23,428點。A股改寫緊40個月以來高位紀錄,港股的弱勢,形成強烈反差。

昨日跌市成交不跌反升,主板有1,231億元,沽空成交200億元破晒紀錄,佔大市成交比例升至16.3%,印象中,海嘯之後都未見過咁場面。單係兩隻A股ETF安碩A50(02823)及南方A50(02822)佔85億元沽空,相當沽空金額四成二。

在內地連續六星期A股開戶散戶高企20萬樓上,開始見到全民皆股炒到出煙之下,機構投資者佔市場交易額八成以上的香港魚缸,擺出一副完全唔相信的姿態。到底今次內地紅色散戶定係環球大孖沙睇錯市,睇相佬呃你十年八年,呢啲咁極端市況,相信好快會現形。

A股超買隨時掉頭

今年滬綜指累積升幅三成一,係全球最好表現股市之一,仲要大部分升幅在九月後,內地散戶開始炒人行鬆手之後先出現。睇見滬綜指9日RSI去到92.5的極極極超買水平,直頭有啲似過山車去到俯衝前一刻的勢頭。最陰功係港股本已經弱勢,如果A股隊埋一份,年尾流流隨時累埋街坊咁就慘情。

今年新股超購王,眾望所歸由內地核電一哥中廣核電力(01816)以市傳的286倍超額奪冠,以凍結資金估計3,500億元計,將會排在港股史上凍資王的第八位。若以超購達一百倍,將回撥總發行股數兩成到公開認購部分,雖然未知分配側向「大飛」抑或「細飛」,古勝篤一篤機,估計平均分配比例估計1.4%左右,1.5厘孖展入大飛計落升兩個巴仙已夠使費。

若果以暫時街外唱緊一開升兩成樓上,一手或者些少孖展入去抽獎的,應該點都穩坐釣魚船,有錢落袋。不過,值得留意今次中廣核電罕有地有過百張「頂頭槌飛」,佔凍資額近兩成,恐怕大飛客分派比例可能相當奀,有口痕友仲衰到話今次班頭槌飛隨時蝕息都未定。

工行優先股夠火熱

輪都輪到工行(01398)發優先股,昨日一早公布,指標息率介乎6至6.25厘,私人銀行班老友話昨日聽電話聽到晏都無時間食。無他,之前中行(03988)優先股以6.75厘定價,因為近排人行減息,唔經唔覺得升到去6.1厘,最怕貨比貨,一比較下,工行優先股貸評高中行一格,就算上限6厘定價,斷估都有多少水位,所以唔單止好息之徒,昨日仲吸引到一班炒家捧場,據聞因為認購反應熱爆最終提早拉閘。

工行正股股價昨日見好消息出盡被掟的情況,早市高位見一見5.34元,最後撻番落5.22元倒跌一格收市,睇走勢,是七月同九月之後,又一次在5.34元阻力位頂住,技術走勢麻麻。

以昨日收市價計,工行一四及一五年的預期股息率有6.6厘及7.1厘,一班定息產品玩家6厘都追工行優先股,而股市炒家連6.6厘工行正股都沽之而後快,講來講去都係反映一件事,內地銀行在資產質素轉壞,人行不對稱減息,利率市場化等等因素影響下,最賺錢年代可能成過去,甚至估未來業績會因此倒退的是大有人在。

個市氣氛唔好,自然草木皆兵,傳緊今個星期中汽協發表的十一月內地乘用車數據,可能出現零增長,創下○八年以來單月最差數據,一眾汽車股被淡友隊到阿媽都唔認得。比亞迪(01211)昨跌9.2%、吉汽(00175)跌5.2%、東風(00489)跌3.3%。在下早兩日推介,傳佢新款SUV賣得唔錯的長汽(02333),一樣頂唔住要跌2.2%,又打回原形。

二三線城市庫存高

近排資金由唔同板塊流轉速度之快,慢半拍都死得人,好似昨日又再千隻股票向下,足足係上升股份2.2倍多,鍾意炒出炒入,就算叻到輸四隻、贏五隻,計埋都隨時要揩使費,咁嘅市況對魚缸客真係好大考驗。昨日內房股是少數逆市奇葩,有大行出報告話,減按息後內地首星期新屋銷售,按周反彈9%,萬科企業(02202)升4.9%,世茂房地產(00813)升3.2%,越地(00123)升2%,華潤置地(01109)亦上升1.4%。

不過,睇番同樣炒人行減息及資產質素「劣化」速度減慢,首波勁升的內銀股開始立立哋,內房可以升多幾耐,古勝都唔敢亂估,但睇見統計話二三線城市庫存情況好可能短期都唔會改善,短炒識上車,謹記要見好識收。

古勝