孖妹Ｓ檔案：諾獎經濟學絕對關你事
最新諾貝爾經濟學獎得主上周揭盅，由呼聲甚高的法國經濟學大師蒂羅勒（Jean Tirole）獨得。孖妹對經濟學嘅認識只停留於「小學雞」級數，要解釋甚至應用得獎理論自然係一頭霧水，所以今期請嚟兩位經濟學「達人」齊齊溫故知新，講吓諾獎理論同我哋生活有幾息息相關！
徐：科大經濟系客座副教授 徐家健
莊：中大全球經濟及金融研究所常務所長 莊太量
監管壟斷睇行業而定
2014年得獎者
蒂羅勒（Jean Tirole）
研究範疇：企業壟斷、市場力量和監管
Kitty： 蒂羅勒引用博弈論（Game theory）及合約理論（Contract theory）等工具分析管制問題，認為政府對於寡頭壟斷嘅監管要識得「因人而異、對症下藥」，方法唔可以一刀切，否則會適得其反。現實中有咩例子呢？
徐： 有啲行業的確比較特別，唔係透過引入競爭或實施價格上限管制就可以解決壟斷問題，例如本港電訊業，政府重拍部分3G頻譜，認為可以增加行業競爭，但結果會係消費者最蝕底，一來電訊商會將增加咗嘅成本轉嫁畀消費者，二來又會影響電訊商日後對基建嘅投資，繼而影響服務質素。
彩兒： 金融海嘯後全球對銀行業都加強管制，滙控（00005）早前仲話因合規成本增加影響派息。蒂羅勒嘅理論又可否套用於銀行業？
徐：都可以o架，但暫時較少人研究！由於金融行業較專，監管者喺唔了解行業狀況下進行監管，往往會增加管制成本，但又未必收得成效。同時，企業嘅合規成本又會增加，最後反而影響投資者利益。
「效率市場」冇得估市？
2013年得獎者
法馬（Eugene Fama）、席勒（Robert Shiller）、漢森（Lars Peter Hansen）
研究範疇：資產價值、資產市場趨勢
彩兒：法馬被喻為「效率市場假說」先驅，指股票價格會迅速受到新資訊影響，投資者短期內極難預測股價。即係無可能跑贏大市？
莊： 就好似開六合彩咁，如果消息流通，個個都知下期開咩『冧把』，個個都買，咁最後應該無人贏到錢。法馬嘅結論係：股市係不能被預測嘅。其實我自己都試過用技術分析研究呢個理論，長線嚟睇，投資中國、東南亞等新興市場，較投資歐、美等成熟市場嘅獲利機會大。可能意味新興市場「效率」低啲，資訊未完全流通，所以波動性增加。
徐：其實席勒有略為補充，認為股票價格嘅波幅遠超股息浮動嘅幅度，所以雖然短期內難以預計資產價格升跌，但三年或以上嘅長期卻可被預計。值得一提嘅係，當年理論推動咗股票指數基金嘅誕生，例子有盈富基金（02800），為難以掌握市場資訊嘅投資者提供多一個獲利途徑。所以，政府建議設立強積金（MPF）「核心基金」都唔係無道理。
資源分配都要講「博弈」
2012年得獎者
沙普利（Lloyd Shapley）、羅思（Alvin E. Roth）
研究範疇：市場機制設計及資源穩定分配（Stable allocation）
Kitty：兩位經濟學家將博弈理論應用到日常分配，以解決價格機制缺陷，令資源得到合理分配，果然有意思！但好似同投資、宏觀經濟少啲關係噃。
徐：佢哋嘅研究已經成功應用喺唔同範疇，好似學位分派、腎臟捐贈等等。諾獎經濟學理論對學術界固然有貢獻，但同時對現實社會有貢獻、可以應用喺公共政策中嘅例子就唔多，所以真係好難得！
「出口術」為調整預期
2011年得獎者
薩金特（Thomas Sargent）、西姆斯（Christopher Sims）
研究範疇：宏觀經濟學因果關係
彩兒：薩金特係理性預期（Rational Expectation）學派嘅領袖人物。同宏觀經濟學有咩關係呢？
莊：打個比喻，理論上大家都相信加息會令一年後嘅資產價格下跌，但如果投資者係理性嘅，知道股市將會下跌，就肯定會即時沽貨，而唔係一年後先沽，結果跌市就變成Self-fulfilling（自我應驗）。政策同經濟其實係互相影響，政府推出政策時，就要考慮埋呢啲可變因素。
Kitty：咁我明喇，所以聯儲局喺退市期間都要時不時「出口術」，調整吓市場預期。
失業保障未必好事？
2010年得獎者
戴蒙德（Peter Diamond）、莫滕森（Dale Mortensen）、皮薩賴德斯（Christopher Pissarides）
研究範疇：勞工市場供求失衡現象
Kitty：今次我識解！當一個國家嘅失業保障或福利愈多，佢嘅失業率自然愈高，因為市民搵工嘅成本增加！
莊：無錯，特別好多歐洲國家，失業率長期都達雙位數字。佢哋大多走福利主義路線，失業保障太好喇，好多年輕人都唔願搵工做。
彩兒：失業率一直都係評估經濟好壞嘅重要指標，就連美國聯儲局都以失業率降至6.5%作為加息考慮之一。但點解即使歐洲失業率高企，歐股去年表現卻仍然領先全球？
莊：歐洲國家好多時都係「食老本」，例如法國賣名牌袋，係品牌行先，而且當地產業結構以資本投入為主，唔係勞工投入，同香港情況唔一樣。
後記：今屆得主特別巴閉
Kitty：彩兒，聽聞諾貝爾經濟學家嘅得獎機率有數得計！莊教授就曾經寫過篇論文，研究過影響經濟學家得獎與否嘅因素，當中包括發表論文次數、著作被引用次數、出身學院、性別、國籍等。大家都話，今年獲獎嘅法國經濟學大師蒂羅勒認真「巴閉」，不單止打破咗諾貝爾經濟學獎近乎被美國人壟斷嘅慣例，仲要一人獨得殊榮！
彩兒：下年邊位得獎我就估唔到，但今期受訪嘅兩位教授，都不約而同地提醒大家，千萬唔好將諾獎得主視作「神級」，以為佢哋「瓣瓣通」，畢竟經濟學範疇甚廣，加上世事常變，識得反覆求證及發掘新理論更為重要。
彩兒、Kitty
若有料報畀彩兒同Kitty或有嘢問，可電郵money.biz@on.cc