理財創富：海嘯六周年「芬」享苦與樂
今日係金融海嘯六周年，孖妹諗起當年嘅次按危機，都仲有啲心慌慌，更深嘅感受係怨恨當年我哋仲係無知少女，唔識得趁機撈底，之不過經此一劫，日後行走股場都醒目咗。近排同兩位基金經理朋友一齊想當年，佢哋仲分享咗海嘯時嘅愛與恨添！
思博資本 李紹劍 環球幣策衝擊 賺錢更辛苦
李：思博資本基金經理李紹劍（Andy）
彩兒：○八金融海嘯前，你喺大型美資投行管理內部對沖基金，嘯後公司仲喺當年年底結束整個相關部門，咁你咪即時失業？
李：做得投行就食得鹹魚抵得渴，好景時收大額花紅，就預咗市道差冇嘢做！即使你當時估中方向，short咗AIG，一旦政府冇出手打救令佢倒閉，都冇人賠到畀你，所以當時投行士氣好低落，我有朋友怕銀行執笠，索性將全部現金提走。好彩我當年所管理嘅投行內部對沖基金只係虧蝕幾個百分點，翌年初更跳槽至另一間機構從事對沖基金管理工作。
Kitty：你投身金融界近十九年，經歷過唔少風浪，學到啲乜？
李：我從中得到教訓，投資會更審慎，要勝算高先落盤，尋求平穩回報。如果買入股份後，股價唔郁或者跌，認定係Timing或分析唔啱，我就會認錯即沽；如果買入股份升，我會一路喺Target Range內加注。再者，做呢行絕對唔可以情緒化，唔係喺一隻股份輸咗錢就以後唔掂佢。
彩兒：嘯後你嘅投資部署有乜唔同？
李：嘯後各央行出手救市干擾市場，股市變得動盪，分析股市好似上宏觀經濟課，要注視環球幣策。我哋要隨市場改變，投資較以往保守，環球股市嘅壞事全都影響港股市場，但好嘢又唔見會帶挈吓，所以近年投資組合嘅轉換頻率密咗，賺錢辛苦過以前好多。
Kitty：聽聞你○九年幫當時管理嘅基金低位入市喎，咁咪好威水！
李：我買咗幾隻濠賭股同內房股，不過，我喺批股份賺幅超過一倍就沽貨獲利，如果揸到依家就發達喇，其實都幾揼心！
彩兒：市傳美股有崩盤先兆，搞到我同Kitty擔心到瞓覺扎醒啊！
李：美股嘅海外收入約四成來自歐洲，歐元匯價下跌或者會導致調整出現，有機會影響港股。不過都唔影響我嘅部署，因為思博資本旗下基金運用長短倉策略，着重選股，基金年內回報約15%，主力投資本港上市中資股嘅。我相信中國GDP將均速增長，中長線看好國策股，特別係環保及國企改革概念股。
Chartwell Capital 陳惠仁 「現金」打救 平掃名牌股
陳：Chartwell Capital創辦人兼首席投資總監陳惠仁（Ronald）
Kitty：你○八年六月開始接受客戶資本做投資，究竟點樣死裏逃生？
陳：我當年六至十二月只係將約四成資產投入股市，仲揸住六成現金，其實「現金」救咗我，當時只輸約12至13%，跑贏恒指當年約五成跌幅，○九年就賺至平手，好彩冇打輸呢一仗，我畀自己當時表現51分啦！
彩兒：咁你嘯後有冇坐艇先？
陳：嗰陣最慘係買咗中移（00941），我喺當年八月中，九十幾蚊價位開始入貨，本來諗住佢由160蚊開始插落嚟，點估到佢可以跌到得番50蚊？雖然佢年尾上返八十蚊左右，帳面都輸十幾個百分比。之後我一直持貨，又喺約六十蚊加注，到近期佢返家鄉我就全數沽出，計入多年所收嘅股息先有錢賺，呢隻股真係令我受到極大心理創傷啊！
Kitty：唔使咁嬲，○九年股市低谷你都掃到平貨吖。
陳：當時國際名牌股真係平到不得了！我喺微軟約23美元時掃貨，持貨至一二年33元時沽貨獲利，累計回報達43%。另可口可樂當時未拆股，我好想吼佢40美元樓下、分20日入貨，並建立佔5%資產嘅持倉，後來只得約9個交易日符合目標價位，因想博佢回調，最終只入得2%資產貨，嗰陣好應該勇啲！
彩兒：你都算劫後餘生喎，有冇頓悟？
陳：「價值」喺我眼中嘅定義已經今時唔同往日，金融海嘯令我有鍛煉心理質素同成長嘅機會。雖然市場資訊重要，但係我奉行價值投資法，有時都需要抽身。而各國政府救市先例一開，就唔可以純粹分析股份價值，更加要了解政治、資金流向及觀察大勢，情況喺亞洲區尤甚。
Kitty：你隻基金年內回報有一成，之後打算點部署？
陳：目前美股估值偏貴，跌市風險加劇緊，我暫時會避開美股；港股方面，尚有二千至三千點上升空間，未來走勢視乎金融股能否做好。我最近留意緊中型內房股，專注河南地區業務嘅建業地產（00832）算係心水之一，另外我揸緊勝獅貨櫃（00716），博未來受惠航運業復甦。
恐慌時貪婪 股樓大翻身
雷曼兄弟轉眼執笠六年，如果當年股災蒙住眼撈底，揸到今日都應該發過豬頭！真係深深體現股神巴菲特「在別人恐慌時貪婪，在別人貪婪時恐慌」嘅至理名言。
睇番嘯前至今環球各大指數表現，最鯉魚翻身嘅係德國DAX指數、道指及日經指數，分別累計爆升54.79%、48.73%及30.57%。至於港股表現都唔弱，上揚27.09%。
嘯後藍籌股爆升唔少，騰訊（00700）升9.19倍，昆侖能源（00135）升2.93倍。國指成分股中，表現最好係長城汽車（02333），飆升24.4倍、比亞迪（01211）升5.25倍。
當年銀行收緊按揭信貸，沙田第一城呎價跌穿過2,800元建築呎價水平，一個395呎單位只係盛惠106.8萬大元，不過目前同類單位建築呎價高達11,300元，勁升三倍。
高妹、彩兒
若有料報畀高妹同彩兒或有嘢問，可電郵money.biz@opg.com.hk