股博士隨筆:保利協鑫中線看好

雖然大市上周連跌五日,但光伏板塊相對偏強,即使上周尾段信義光能(00968)、保利協鑫(03800)以及興業太陽能(00750)皆錄得多少跌幅,但只要將相關股份近月走勢與大市比較,就明顯見到光伏股大勢仍是跑贏大市。

講到尾都係因為資金睇好光伏板塊將繼續受惠於內地積極推動新能源行業發展,加上過去兩年光伏行業雖陷入低潮,但近期相關股份業績開始有起色,故見醒目錢已先知先覺,即時行動,今日就同大家研究隻保利協鑫。

大家可能會問,為何要揀保利協鑫?首先,雖然上周中段資金轉吼二三線股仔,但當日成交縮減;相反,早前成交暢旺時,上升動力主要見於指數權重股、大價股及行業龍頭股,故要賭光伏板塊中線「起死回生」,當然博隻行業龍頭保利協鑫。

其次,協鑫截至六月底止中期業績顯著改善,收入較去年同期上升52%至約172億元;毛利約36.7億元,較一三年同期上升約393%。

產品需求復甦

業績改善主因是期內光伏產業經營環境較去年同期大幅改善,而由於預期今年全球光伏應用市場裝機總量將較去年增長22%至45吉瓦,故不難想像集團全年業績將會更加「靚仔」,股價亦自然易升難跌。

走勢上,該股上周五跌3.9%至2.92元收市,但仍守穩多條主要平均線,且MACD續處雙牛,估計中線上升動力有餘未盡,短期支持位在2.87元,守穩可逢低買入,目標3.5元,跌穿2.8元嚴守止蝕。

DR.Stock